Shillong, Risaw 07
Kum ka jingbteng ïa ka jingïarap jong ki ïa ka thaiñ Dalu kaba la shah ktah ha ka jingshlei um, ka State Disaster Response Force (SDRF) jong ka Jylla ha ka Sngi U Blei ka la synran ïa ka bor pynïaid ka Block ban sam ïa ki lad jingïarap ha ki katto-katne ki bynta jong ka C&RD Block.
Ka kynhun jong ka SDRF ka la pynkit bad sam ïa ki tiar jingïarap sha ki jaka kum ka South Kujikura, Rengrampara bad Adanggri bad ka ophis jong ka Dalu C&RD Block.
Ha Barongpara, ka SDRF ka la hap ban ïaid lyngba ka wah da ka lieng ba la shna kyrpang bad ki tyllai ban pynpoi ïa ki tiar sha ki nongshong shnong katei ka thain.
Lah ban kdew ba ka kynhun SDRF ka la don ha ka thaiñ Dalu kaba la shah ktah ha ka jingshlei um naduh ka Sngi Thohdieng (hadien ka jingshlei um) namar ka jingjur jong u slap.
Kane ka long katkum ka kyrwoh na u Additional Public Relations Officer, Directorate of Civil Defence & Home Guards, Meghalaya, Shillong, Bah P.H. Shylla.
