New Delhi, Risaw:
Katkum ki khubor, la ong ba ha kane ka por ba ka thma jong ka Israel bad ki lehnoh hamas ka la kynjoh shi snem, ki kynhun wad bniah jong ka US ki la ioh jingtip ba ki lehnoh Hezbollah jong ka Lebanon pat ki la thmu ban leit thombor sa sha ka nongbah ba lai napdeng ki nongbah ba heh tam jong ka Israel, ka Haifa.
Namar la ong ba ka thma jong ki lehnoh Hamas ka la sdang ha ka 7 tarik u Risaw jong u snem 2023 bad kumta ha kane ka Sngi Nyngkong, katei ka thma ka la kynjoh shi snem thik bad kane ka thma ka dang iai bteng haduh mynta namar ka jingbym seisoh jong ki jingiapynbeit bad ki jingiakren iasuk hapdeng ka Israel bad ki Hamas. Kaba kham shyrkhei ka long ba kane ka thma ka la sdang ban pur sa sha kiwei bynta ki ri kum ka Iran bad ka Lebanon namar ka jingai jingkyrshan jong kitei ki ri lehnoh ia ka Hamas kaba synshar hi da lade ia ka nongbah Gaza da ki phew snem mynta.
Kumjuh ruh la ong ba ka jingleit hiar thma jong ka Israel sha Gaza pat ka la shim ia ka jingim jong 41,000 tam. Kiba bun na kine ki dei hi ki riew paidbah ki bym shym la iadon bynta bad ka Hamas ha ka jingleit thombor pyrshah ia ka Israel ha utei u snem ba la leit.
