Khliehriat, Risaw 07
Ka Dkhiah West SC, Lumshnong YWSC bad Lakadong Ummat ki la rung sha ka quarter final ha ka lympung ïalehkai 3rd Division Football Tourna-ment ba la pynïaid da ka East Jaiñtia Hills District Football Association (EJHDFA) hadien ba ki la ïoh jingjop ha ka Lah Sngi U Blei.
Ha ka jingïakhun jong ka pre-quarter final kaba la long ha Deinshynrum kaba ha Khliehriat, ka Dkhiah West SC ka la pynliem ïa ka Suchen Mulieh YWSC da 1-0 kol bad ïa kane la thep da u Synran Langmiki Phawa ha ka minit kaba 80+2.
Ha ka jingïalehkai kaba bud, ka Lumshnong YWSC ka la pynliem da 2-1 kol ïa ka Moolang SC. Ïa ki kol jong ka Lumshnong la thep da u Demi Khonglah ha ka minit kaba 16 bad Shkemborlang Rupai ha ka minit kaba 40+1. Katba ïa ka shi kol jong ka Moolang la thep da u Refine Dkhar ha ka minit kaba 80+4.
Ha ka jingïalehkai kaba khatduh jong kane ka pre-quarter, ka Lakadong Ummat SCC ka la pynliem ïa ka Musniang Rim SC lyngba k tie-breaker da 2-0 kol hadien ba ki la ïakhaid mar shi kol haduh kaba kut ka jingïalehkai.
Ïa ka kol jong ka Lakadong Ummat la thep da u Nineky Suchen ha ka minit kaba 40 bad ïa ka kol jong ka Musniang Rim la thep da u Niki Dkhar ha ka minit kaba 61.
Ha ka 9 tarik ka jingïakhun quarter final kan long hapdeng ka Wapungskur SSWO pyrshah ïa ka Moopyniein SCSO ha ka por 12:30 mynsngi, katba ka Ratacherra CSC ïa ka Tuberkmai Shnong ha ka por 3 baje janmiet.
