Shillong, Risaw 07
Ka synjuk ïalehkai jong ka Meghalaya Cricket Association (MCA) ka la pynthymmai biang ïa ka kynhun ïalehkai jong ka Jylla na ka bynta ka Ranji Trophy 2024-25 ha ka jingïalang kaba la long ha ka Lah Sngi U Blei.
Ha kane ka kynti kaba mynta ka MCA ka la weng noh ïa ka kyrteng jong u Arpit Bhatewara bad pynmih bujli noh da u Shembhalang Pyngrope, uba la long uwei na ki nongïalehkai ba la pynap lypa.
Wat la na ka liang ka MCA kam shym la ai kano-kano ka daw halor ka jingweng noh ïa u Arpit, hynrei la sngewthuh ba ka lah ban dei na ka jingujor da ka seng Hynñiewtrep Youths’ Council (HYC) pyrshah ïa utei u rangïalehkai lem bad katto katne kiba la kynnoh ba kim dei ki nongshong shnong ba pura na kane ka Jylla.
Ka jingjied na ka bynta ka kynhun ïalehkai ka dei na ka bynta ar tylli ki jingïalehkai jong ka Ranji bad lah ban kylliang biang ha kaba kane kan shong ha ka jinglah ban ïalehkai bha jong ki. Ka jingïalehkai Ranji kaba nyngkong eh jong ka Meghalaya kan long pyrshah ïa ka Services shabar na la ïing naduh 11 haduh 14 tarik mynta u bnai ha shwa ba kin wan phai sha la ïing ban ïakhun pyrshah ïa ka Tripura naduh ka 18 haduh 21 tarik mynta u bnai ha Shillong.
Ïa kane ka kynhun yn bteng ban shimti kum u kapten da u Kishan Lyngdoh, katba Dippu Ch Sangma kum u vice-captain. Kiwei pat ki rangïalehkai kiba la jied thymmai ki long u Aryan Borah, Akash Kumar Choudhary, Shembhalang Pyngrope, Bamanbha Shangpliang, Bijon Dey, Chengkam Sangma, Jaskirat Singh Sachdeva, Ram Gurung, Roshan Warbah, Swarajeet Das, Ajay Duhan (BCCI approved guest professional player), Sumit Kumar (BCCI approved guest professional player) & Anirudh B (BCCI approved guest professional player). Katba kiba la pynap lypa ki long u Adarsh Joshi, Anish Charak, Lerry G Sangma & Yogesh Tiwari.
