Shillong, Risaw 08
Wat la ka por ka la ïaid sha ka arphew sngi naduh ba la lap ïa ka met jong ka longkmie bad i heprit na ka wah NEHU kaba don ha syndah ka Mawlai Mawïong Umjapung, hynrei haduh mynta ym pat lap ksai hadien ba ki bahaïing ki la suba ba ka lah ban dei ba ki shah pynïap.
Kane ka longkmie kaba ïa ka met la lap na wah NEHU ka dei ba la tip kyrteng kum ka Kong Neinsidalin Riahtam, 45 snem ka rta bad i heprit, 5 snem ka rta kiba la jah na la ïing naduh ka 18 tarik Nailur 2024. Ha ka sngi kaba bud ka 19 tarik Nailur 2024 la lap pynban ïa ka met jong kine ar ngut na katei ka wah.
Haba na ka liang jong ki bahaïing ryngkat ki nongkitkam shnong ki la don ka jingsuba halor kane ka jingjia, ki la leit ban buddien na ki pulit ka thanat Mawlai ban wad ïa ki briew kiba donkti.
Katkum ka jingïathuh ki bahaïing na ka liang ki pulit kin ap shwa ïa ka kaiphod na ki doktor na NEIGRIHMS hospital hadien artaïew.
Haba pyrshang ban wad jingtip, na ka liang ki pulit haduh mynta kim pat lap ksai eiei halor kane ka jingkhlad jong kine ar ngut.
Katkum ka jingïathuh ki bahaïing ha kine ki sngi, ki dang ap ïa ka kaiphod na ki doktor hadien ba la dep post mortem.
Kum ban shu pynkynmaw ha ka 18 tarik mynta u bnai, ka Kong Neinsidalin ka la ïalam kai lang ïa i heprit ban leit peit ïa ka ïing ba dang shna kaba don hajan ISBT naduh 10 baje eiei mynstep, hynrei haduh ka por janmiet ruh ki khlem wan phai ïing shuh. Dei tad haduh ka por 9:30 eiei mynmiet ki ïoh jingtip da kaba ïa phone kylleng kylleng, ba ka Kong Neinsidalin bad i heprit kim shym pat wan ïing. Kumta mar mar ki la pyntip noh sha ka shnong ban ïa wad.
Na ka liang ki nongshong shnong ka Mawïong Umjapung mar shu ïoh jingtip ïa kane ka khubor mar-mar ha katei hi ka miet ki la ïa mih ban ïa wad ban shem ïa kine ar ngut hynrei haduh ka 3 baje ruh kim lap satia. Kumta dei tad ha ka sngi kaba bud, kata ka 19 tarik ha ka por 12 baje eiei shiteng sngi la lap pynban ba kine ar ngut ki la thiah ïap ha kawei ka wah kaba ki khot ka Wah NEHU.
