Jop biang ka BJP ha Haryana yn bteng biang ka jingsynshar ha ka sien balai

New Delhi, Risaw 08

Ka BJP kaba la mad ïa ka jingdiaw namar ka jingbym poi sha ka thong kumba la thmu ha ka ilekshon MP (Lok Sabha), ka la ïoh mynsiem biang da ka jingjop ha ka ilekshon MLA ha Haryana bad ïoh ban synshar lai sien kynthih ha kane ka Jylla kaba kiba bun ki la kheiñ antad ba ka Congress kan long ka nongjop bad kan ïoh ban shimti ïa ka jingsynshar.

Hynrei ha Jammu and Kashmir kaba la duh noh ïa ka Article 370 ha ka Sorkar Pdeng bad shah pynkylla na ka Jylla sha ka Union Territory, ka National Conference bad ka Congress kiba la ïatreilang, ki la poi sha ka thong ban ïoh synshar hadien ka jingjop ha kane ka ilekshon MLA kaba la pynlong ha ka sien banyngkong hadien 10 snem. Ka Election Commission of India ka khlem pynlong ilekshon shuh ha Jammu and Kashmir hadien ba ka Sorkar Pdeng ka la pyndam noh ïa ka Article 370 bad pynduh noh ïa ka Jylla Jammu and Kashmir bad kane ka ilekshon MLA kaba mynta ka dei ka banyngkong eh ïa ka Jammu and Kashmir kum ka Union Territory.

Ha ka jingñiew vote na ka bynta ka ilekshon MLA ha Haryana bad Jammu and Kashmir ha ka Sngi Ba-ar, ka Bharatiya Janata Party kaba bat ïa ka bor synshar ha Haryana, ka la ïoh jingjop bad ïoh synshar biang ha ka sien balai, katba ha Jammu and Kashmir, ka Congress bad ka National Conference kin ïoh ban synshar hadien ba kine ar tylli ki seng ki la lah ban ïoh jingjop ha ki bun tylli ki konstitwensi.

Ka Haryana ka don 90 tylli ki konstitwensi bad ka Jammu and Kashmir Union Territory ruh ka don 90 tylli ki konstitwensi.

Ka BJP ka la ïoh jingjop ha ki 48 tylli ki konstitwensi ha Haryana bad kan ïoh synshar lai sien kynthih ha kaba ka jingjop ka la pynkyndit ïa kiba bun namar ka BJP kaba la dep synshar ar sien lynter ha kine ki 10 snem kan ïoh synshar biang mynta ha kine ki san snem ban sa wan.

Hynrei ha Jammu and Kashmir, ka National Conference bad ka Congress kiba la ïatreilang ha kane ka ilekshon ki ïoh jingjop ha ki 49 tylli ki konstitwensi na ki 90 tylli ki konstitwensi, katba ka BJP ka la ïoh jingjop ha ki 29 tylli ki konstitwensi.

Ka People’s Democratic Party (PDP) ka seng kaba ïalam da ka Mehbooba Mufti kaba dei ka Myntri Rangbah barim ka Jammu and Kashmir ka la lah ban jop tang ha ki 3 tylli ki konstitwensi.

Kaba kham pynkmen eh ka dei ïa ka Aam Admi Party (AAP) namar ka la ïoh ban jop ha kawei ka konstitwensi lyngba u nongïalam jong ka, u Mehraj Malik.

U nongïalam ka National Conference u Omar Abdullah u la jop na baroh ar tylli ki konstitwensi kata na Budgam konstitwensi bad Ganderbal konstitwensi.

Ka Congress ka la jop ha ki 6 tylli ki konstitwensi katba ki kyrtong shimet kiba ïoh jingjop ki don 7 ngut.