Guwahati, Risaw:
U Myntri Rangbah ka Assam u Himanta Biswa Sarma ha kawei ka jingïalang ba la pynlong ha Sonipat, u la kyntu ban leh eiei pyrshah ïa ki riewsaiñ pyrthei kiba don jingïadei bad ka kam khaïi drok.
U la pynpaw ïa ki jingsngewkhia halor ka jingshalan ïa u drok sha Haryana bad Punjab, da kaba kdew ba ki nongshah suba ki la pynpaw ïa ka jingshalan drok kaba jur sha kine ki jylla.
U Sarma u la ïathuh ba ki pulit Assam ki la kem palat 200 ngut ki briew kiba donkti ha ka kam khaïi drok ha kine ki lai snem shiteng ba la dep.
U la pan ka jingkyrshan na ki paidbah ha ka ban pyrshang ban khanglad ïa kito kiba don jingïadei ha ka kam khaïi drok ba kin rung ha ka kam saiñ pyrthei, da kaba ong, “Ka long kaba kongsan ba uno uno uba donkti ha kum kine ki jait kam um dei satia ban ïoh jingbit ha ka ban rung sha ka kam saiñ pyrthei.”
U Myntri Rangbah ka Jylla u la kynthoh ruh ïa u Rahul Gandhi, u nongïalam ka seng Congress, halor ka jingkren jong u ba dang shen, halor ka jingbuh kyrpang, da kaba kdew ïa ka jingkylla ha ka nongrim jong u, ha kaba ïadei bad ka jingïada ïa ka Riti synshar.
U Sarma u la pynthikna ïa ki nongwan jingïalang ba u Myntri Rangbahduh ka ri u Narendra Modi u la kular ban pynneh ïa ka jingbhah bakyrpang kumba ki dei ban long na ka bynta ki kynhun jaitbynriew.
