D. H. KHARKONGOR
Ka jingthmu ka jong uto u shitniam Hindu, ryngkat ki nongkyrshan ki jong u, ban sieh pynkaweh, ha baroh kawei ka Ri India, ïa ka Lama jong ka dur jong ka Masi, kynthup wat hangne ha Shillong ha kaba u paid uba bun um dei u Hindu, ka da pynkyndit hi thret la jan ïa baroh, khamtam eh ïa u trai jaka trai mula. Ka long kumta wat ïa kiwei kiwei ki bym dei ki Khristan. Kumta ka jingsngew pyrshah na baroh u bym dei u shitniam Hindu kat ban ïa dawa, da kawei ka sur, ban nym ai jingbit da leilei ruh em ïa kum katei ka jingthmu. Kaba sngewtynnad ka long ba wat ka Central Puja Committee (CPC) jong ka Shillong hi ruh kam ïa mynjur bad uto u shitniam Hindu. Ka jingthmu kaba lah ïa tip shaikdar da baroh shano pynban kansa lam. Ka jingsuk mynsiem ïa baroh tang mar shu ioh ïa ka khubor kaba thikna ba ka bor pynïaid district kam ai syndon ïa ka jingbit ïa u shitniam Hindu wat tang ba un ioh ban iuhkjat ha ka Shillong Airport. Ka jingshongsuk, namarkata, ha ka nongbah Shillong. Ka jingkyrmen ba kan nym mih kano kano ka jingpynthut pynwit ïa ka jingrakhie laitluid ïa ka Durga Puja. Te mano bym kyrmen tang ïa ka babha.
Kumta la ïa khmih lynti tang ïa ka babha phewse kumba ar-laisngi ba ka sngi ka buh rieh pynban ïalade, khlem da pyni shuh wat tang shipor ïa la ka jong ka durkhmat. Ar-lai sngi ka suiñbneng ka shu long sui-sui kat haduh ba ym lah ban iohi shuh ïa u mawsiang bneng, kaei kaei kaba phylla ha kat ka aiom Synrai. Wei briew nga kum poi shat jingmut ba ioh kan dei ka dak ka shin ba lah ban khie u jumai uba khamjur, lada ym eh u jumai bah. Kumta klet noh jlang ba ka lyiur kam pat pyndep ïa la ka jong ka jingphaidien ka jong ka, kaba pura. Kyndit thret ynda ther biang u slap, ynda haba ithuh shai ba ka dei ka jingphaidien biang noh jong ka lyiur. Kaba ha kane ka kynti ka da phaidien pat ruh kham dier ka por. Ka rukom phaidien ka jong ka pat de ruh kaba kat ban pynkhuslai jingmut bad pynrit mynsiem ïa kat kiba dei hok ba kin khuslai jingmut bad kiba dei ban rit mynsiem. Kaba ha kane ka kynti kaba mynta ka da lynshop tyngeh tyngeh bha ïa kata ka phang sepngi jong ka Ri Lum Garo. Kaba katba nangmih ki sngi nang sngewthuh shai ïa ka bor jingpynjulor ka jong ka. Ka jingduhnoh jong ki mynsiem briew, ba kordor, ruh kaba lah da bun shisha shisha. Ym lah khlem da sngewlem ïa baroh kiba la shah lynshop tyngeh ha kane ka kynti kaba mynta. Kiba la duh lehnohei noh ïa la ki jingdon jingem. Ym lah khlem da sngewlem ïa kiba duh noh syndon ïa la ka jong ka mynsiem kaba kordor.
Kat nangmih ka lyiur katta la nang sakhi ïa ka jingradbah jong ka bor pynjulor ka jong ka. Ki dak ki shin ba ngim dei shuh ban dang ïai shim sting ïa ka bor jingpynjulor ka jong ka. Ki dak ki shin ba nangne sha khmat ngi baroh ngi dei ban husiar noh hangto ban pynïeng ïa la ki jong ki jingtei, kata, naduh ha ki sharing bad ki ranab lum tad haduh ha ki jaka them. Ka por ka la dei ba ngin kiar noh ïa ki sharinglum bad ban ïa ïajngai noh ruh katlah katiai na ki wah, kampher la ki dei kiba rit ne kiba heh. Ba ngim dei shuh ban dang ïaipynthuh pynwit ne dakhol jubor ïa ka lynti ïaid laitluid ka jong ki. Ngin hap ban burom lem noh ïa ka meimariang lada ngi kyrmen tang ïa kaba ba bha.
Mano u bym kyrmen ïa kaba bha ha kane ka Durga Puja, kaba katno tam ïa u Hindu, kata, naduh naka jingpynkhreh ïa ka Puja tad haduh kaba rakhie pynkut ïa ka Durga Puja. Uba ap khmih lynti lem bad ka jingkyrmen ïa ka Durga Puja kaba phuh kaba phieng, kaba dap da ka jingkmen ka jingsngewbha bad khamtam eh kaba ha ryngkat ka jingshongkun ka jingshongkhia. Ka long kumta kumjuh ïa baroh uba ju khmih lynti ba ka kamai ka kajih ka jong u kan kham kiew kyrpang ha ka Durga Puja. Uba namar kata u angnud ba ka ïew kan thnem bad ym ba kan long tang kum ba ka ju long man la ka sngi.
