Shillong, Risaw 08
Ka tnat pynïaid ilekshon ha kane ka Jylla kaba la ïaid shaid-shaid ka jingpynkhreh ban pynmih ïa ka thup kyrteng kaba thymmai jong ki nongthep, ka la dep ban pynshisha ïa ki kyrteng jong ki 21,79,106 ngut ki nongthep ‘vote’ na ki 22,41,984 ngut kiba don ha ka thup kyrteng, bad la lap ba ki don 1,354 ngut kiba don kyrteng ha ki ar jaka.
Ka jingpynshisha kaba la dep ban leh ïa ki kyrteng ki nongthep ‘vote’ ka long 97.20%.
Haba kren sha ki lad pathai khubor ha ka Sngi Ba-ar, u Chief Electoral Officer (CEO) ka Jylla u B.D.R Tiwari u la ong ba ki don ki tarik bapher-bapher kiba la buh na ka bynta ban pyndep ïa ka Special Summary Revision jong ka thup kyrteng ki nongthep ‘vote’ na ka bynta u snem 2025 ha kaba ka sngi ban pynmih ïa ka thup kyrteng kaba thymmai jong u snem 2025 jong ki nongthep ‘vote’ ka dei ha ka 6 tarik Kyllalyngkot, 2025.
Napdeng ki nongthep ‘vote’ kiba la don kyrteng lypa, la lap ba ki don 23,161 ngut kiba la khlad noh tad haduh ka 8 tarik Risaw, 2024.
Ha ka Sngi Ba-ar, u CEO u la ïakynduh ruh ïa kiba mihkhmat ïa ki seng saiñ pyrthei bapher-bapher bad ki la hun ïa ka jingbatai u CEO shaphang ka Specially Summary Revision kaba ïadei bad ka jingpynrung kyrteng ïa ki nongthep naduh ka jingweng kyrteng ïa kiba la khlad noh bad ka jingweng kyrteng ïa kiba don kyrteng ha ki ar jaka ne ar tylli ki konstitwensi.
U CEO u la ong ba ha kane ka Summary Revision of Electoral Roll ka don ka jingleit pynshisha sha man la ki ïing ban pynshisha (House to House Verification) lyngba ki BLO, ban pynbeit biang ïa ki jaka thep ‘vote’, ban pynbeit ïa kino-kino ki jingduna ha ki thup kyrteng thep ‘vote’ nalor kiwei kiwei ki mat.
La sdang ïa kane naduh ka 20 tarik u Nailar bad kan kut ha ka 18 tarik u Risaw. Ka jingpynkhreh ïa ka Integrated Draft Roll da kaba shim ïa ka 1 tarik u Kyllalyngkot 2025 kum ka ‘Qualifying Date’ yn pyndep ha ka 28 tarik u Risaw.
Halor ka jingpynbeit biang ne Revision, u CEO u la ong ba ïa ka jingpynmih ka Integrated Draft Electoral Roll kan long ha ka 29 tarik u Risaw.
U la ong ruh haba ïadei bad ka jingpynksan bad ujor ïa ki jingkam kan long naduh ka 29 tarik u Risaw haduh ka 28 tarik u Naiwieng.
Kan don ruh ka jingpynlong ïa ka Special Campaign ha ka 15 bad 16 tarik bad 21 bad 22 tarik u Naiwieng. Ka jingpynkut noh ïa ki jingkam bad jingpyrshah kan dei hapoh jong ka 24 tarik u Nohprah bad ka jingpynmih ïa ka Final Electoral Roll kan long ha ka 6 tarik u Kyllalyngkot 2025.
