Nongstoiñ, Risaw 08
Ka Lumsohkhlur SC na Pyndengumïong DSA ka la ïoh ban rung sha ka lympung ïalehkai Meghalaya State League 2024 ban pynlong da ka Meghalaya Football Association.
Ka jinglah ban pynthikna kane ka kynhun ban ïoh rung sha katei ka lympung kaba heh duh ha ka Jylla, ka la wan hadien ba ka la pynliem noh ïa ka Mawlarshong SC na ka Nongstoiñ District Sports Association lyngba ka tie-breaker da 6-5 kol ha ka ‘play-off qualifier’ na ka bynta ka West Khasi Hills Zone kaba la long ha ka sngi Ba-ar ha madan Mawkadiang.
Lah ban kdew hangne ba ka Mawlarshong SC ha ka jingïalehkai play-off qualifier kaba nyngkong ka la pynliem noh da 3-1 kol ïa ka Sienduli -I SC na ka Mawshynrut Sports Association ha kaba kane ka la pynlong lehse ïa kane ka kynhun ban don ka jingkyrmen ban ïoh rung sha ka lympung MSL, hynrei lyngba ka jingshah rem noh ha ka Lumsohkhlur ka la pynlong ia ka Mawlarshong ban duh noh ïa ka lad ban jam sha ka MSL mynta u snem.
