Shillong, Risaw 08
U Bah Bobby L. Nongbet uba bat ïa ka A-Licensed Coach ha ka Jylla, u la shah jied ha ka synjuk ïalehkai jong ka All India Football Federation (AIFF) ban ïashim bynta ha ka Coaching Program (Elite Coaches Football Course) ka ban sdang naduh 10 haduh 15 tarik mynta u bnai ha Reliance Foundation Young Champs kaba ha Mumbai.
U Bah Bobby uba long ruh kum u District Sports Officer (DSO) ka Ri Bhoi District, u la pyndep ïa ka International Coaching Diploma na Budapest, Hungary.
Kumta kane ka jingshah jied ka jong u ka long ban leit pyntbit ha ki kam hikai na ka bynta ka jingïalehkai phutbol bad ban kyntiew ha kane ka jingïalehkai na ka bynta ka Jylla hi baroh kawei.
Kum ban pynkynmaw, u Bah Nongbet u la long uwei na ki Coach uba lah ïoh rah ïa ka nam ‘ AIFF bad AIFC Best Youth Coach Award’ ha u snem 2018.
Ha katei ka prokram yn wan shim bynta da ki coach bapher bapher jong ka ri India.
