Mexico City, Risaw:
Ha kane ka jingjia kaba sngew shyrkhei la ong ba uwei u heh jong ka nongbah Guerrero jong ka Mexico uba dang shu leit sdang trei shen, ha ka Sngi U Blei u la shah pyniap bad shah khrai khlieh noh tang hadien shi taiew duna ba u dang leit trei ia ka kam ha katei ka nongbah.
Ia une u briew la ithuh kum u Alejandro Arcos bad u la shah pyniap noh tang hadien 6 sngi ba u dang shimti ia ka kam kum u heh jong ka nongbah Chilpancingo, ka nongbah kaba don kumba 2,80,000 tam ki paid nongshong shnong ha katei ka nongbah kaba don sha ka phang Shathie-mihngi jong ka Mexico.
Ka Lat jong ka nongbah Guerrero, ka Evelyn Salgado haba pynbna ia kane khubor ha ka Sngi Nyngkong, ka la ong ba ka Guerrero baroh kawei ka pynpaw ka jingsngewkhia kaba jur halor ka jingshah pyniap dusmon jong utei u heh ka nongbah bad ia kiba don kti baroh yn thwet bad pynshitom katkum ki kyndon aiñ.
Ki heh katei ka nongbah ki la lah ban pyntikn ia kane ka jingjia naduh ba la iohi ia ki dur ba la saphriang ha ki rynsan ‘Social Media’ halor katei ka khlieh kaba la lap na kawei ka trok, ia kaba la lah ban pynithuh ba ka dei ka khlieh jong utei u heh uba la ju ia ithuh paidbah kum u Arcos.
