Shillong, Risaw 09
Ka Nongkseh SC ka la ïoh ïa ka jingjop kaba nyng-kong ha ka lympung ïalehkai First Division Football League 2024 ba la pynïaid da ka Shillong Sports Association hadien ba ka la pynliem noh ïa ka Umphyrnai SC da 4-1 kol ha ka Sngi Balang.
U kapten jong ka Nongkseh FC u Chesterpaul Lyngdoh u la thep ar kol na ka bynta ban pynlong ïa kane ka kynhun ban ïoh lai point.
Ha kane ka jingïakhun kaba la long ha First Ground, Polo, ka Nongkseh ka la lah ban ïalehkai bha naduh kaba sdang ha kaba ka la ïoh ban thep haduh lai kol ha ka kylla step lyngba u Meban Marsharing ha ka minit kaba 14, kumjuh u Samphrangshai Rani (34) bad u Chesterpaul (36). Hynrei na ka liang ka Umphyrnai ka la lah ban pynphai kylla lyngba u Diverjohn Syiemlieh (45+3).
U Chesterpaul u la ïoh thep biang ïa ka kol ba ar ha shwa ban kut ka jingïalehkai kata ha ka minit kaba 81 na ka bynta ban pynlong ïa ka Nongkseh ban ïoh jingjop syndon.
Haba phai sha kawei pat ka jingïakhun ba ar, ka Mawtawar SC ka la pynliem noh ïa ka Nongrah SC da 2-1 kol. Ïa kine la thep da u Fedrick Lyngdoh (52) bad kawei pat la ïarap pynthep da u rangïalehkai ka liang pyrshah u John Marboh (80). Ha shwa ban wai ka Nongrah ka la lah ban pynphai kylla shi kol lyngba Mebankit Lyngdoh (90+1) bad ka la mad ïa ka jingshah rem.
