Shillong, Risaw 09
Ka lympung ïalehkai Meghalaya Youth League 2024 ba la pynlong da ka Meghalaya Football Association ka la jan poi artad sha kaba kut hadien ba ki kynhun ïalehkai U-14 bad U-16 ki la lah ban pynpaw ïa ka jingtbit ha shwa ba kin rung sha ka final ka ban long ha ka Sngi Thohdieng.
Ka jingïaknieh ïa ka nam lahduh ha ka U-14 kin long hapdeng ka West Jaiñtia District Sports Association bad ka Nongstoiñ District Sports Association ha ka 11 baje mynstep. Katba ha ka U-16, ka Shillong Sports Association kan ïakhun pyrshah ïa ka Ri-Bhoi District Sports Association ha ka por 2 baje janmiet. Ïa kine baroh ar tylli ki jingïakhun final yn pynlong ha SSA Stadium, Polo bad ym donkam bai rung na ka bynta ki paidbah nongpeitkai.
Haba sha ka jingïakhun semi final na ka bynta ka U-14 kaba la long ha madan MFA kaba ha Polo, ka West Jaiñtia DSA ka la jop ïa ka Shillong SA lyngba ka tie-breaker da 4-3 kol hadien ba kim shym la lah ban thep kol haduh kaba kut jong ka jingïalehkai.
Ha ka jingïakhun kaba la long kham hadien, ka Nongstoiñ DSA ka la jop da 1-0 kol ïa ka Ri-Bhoi DSA bad kane ka la wan urlong lyngba u Refel Markwius Wanñiang ha ka minit kaba 45.
Ha kaba ïadei bad ka jingïakhun semi final jong ka U-16 kaba la long ha Sports Authority of India kaba ha NEHU, ka Shillong SA ka la jop da 4-1 kol ïa ka West Jaiñtia DSA.
Wat la ka West Jaiñtia ka la lah ban ïalehkai bha ha ka kylla step, hynrei ka la shah thep ha ka kylla miet ha ka SSA lyngba u Iminstar Mawlong (46), Menangpyndap Khongjee (51) bad u Wanpyndap Kharkongor (77). Ha shwa ban wai ka jingïalehkai, ka WJDSA ka la lah ban pynphai kylla shi kol lyngba ka penalty ba la shut da u Serene Dkhar (90+1) ha shwa ba u Menangpyndap (90+5) un thep biang sa shi kol na ka bynta ban ïoh jingjop syndon.
Ha kawei pat ka jingïakhun, ka Ri-Bhoi ka la pynliem noh ïa ka Nongstoiñ SC da 3-2 kol. U Me-u-ba-ai Sumer (9) u la pynkhih jar nyngkong na ka bynta ka Ri-Bhoi ha shwa ba u Mickystar Diengdoh (23) un pynphai kylla na ka bynta ka Nongstoiñ. Ka Ri-Bhoi ka la thep ïa ka kol ba ar lyngba u Prosperwell Ryntong (27) bad ïa kawei pat la thep biang da u Me-u-ba-ai (58). Ka Nongstoiñ ka la pynphai sa shi kol lyngba u Shemborlang Snaitang (85) hynrei ka RBDSA ka la lah ban ïoh jingjop.
