Shillong, Risaw 09
Ka kynhun ïalehkai ka Jylla hapoh ka lama jong ka Meghalaya Athletics Association (MAA) ka la khur kawei ka takma ksiar, ar tylli takma rupa lem bad kawei ka takma rnong ha kaba kut ka lympung ïalehkai 35th East Zone Junior Athletics Champ-ionship ha ka sngi Balang ha Bhubaneshwar, Odisha.
Kane ka takma ksiar ka la wan urlong lyngba ka jingïakop mareh 4x400M Mixed Relay jong ka kyrdan ïalehkai U-20 kaba ka la lah ban pyndep ha ka por 3:48.45 sekhon. Ha kane ka jingïakop la ïashim bynta da u Donbok Shabong, Renaldi Dhar, ka Bethylene G. Makri bad ka Damika R. Lyngdoh.
Ïa ki takma rupa la khur da u Rikangku D. Sangma ha ka kawang sum (Javelin Throw) jong ka kyrdan ïalehkai U-14 ki shynrang hadien ba u la lah ban kawang ha ka jingjngai kaba 52.35 mitar lem bad ka Anrisha Klein ha ka High Jump jong ka kyrdan ïalehkai U-20 ki kynthei hadien ba ka la lah ban kynthih ha ka 1.53 mitar.
Ïa ka takma rnong la khur da ka Rinalis Ingti ha ka High Jump jong ka kyrdan ïalehkai U-20 jong ki kynthei kaba la lah ban kynthih ha ka jingjngai 1.50 mitar.
Kat kum ka kyrwoh la ong ba kane ka kynhun ka la ïoh ban pynkhreh tang kumba katto katne sngi, hynrei ki la lah ban pynurlong na ka bynta ban khur takma ha katei ka lympung bad la khmih lynti ba kin dang ïai bteng ha ka ban khur takma ha kiwei pat ki jingïakop ki ban dangwan.
Ha kawei pat ka liang ka Meghalaya Athletics Association ka la ai khublei ïa kitei ki khynnah kiba la lah ban ïalehkai bha na ka bynta ban wanrah burom ïa ka Jylla hi baroh kawei. “Ngi ai khublei ïa ki Athltics Coach naduh ka Kong Daisy Marweiñ, Bah Pleasantly Synnah, Bah Amin Kharkongor bad Kong Fedelia kiba la trei shitom ban pynbit pynbiang ïa kane ka kynhun. Ngi ai khublei ruh ïa u Director ka tnat ïalehkai u D.D Shira, kumjuh u Asst. Director Bah Païa B. War Nongbri kiba la ai jingkyrshan pura na ka bynta kane ka kynhun,” la pynpaw ka kyrwoh lyngba u Secretary ka MAA u Bah Finely Pariat.
