Shillong, Risaw 10
U Myntri Rangbah ka Jylla, u Conrad K. Sangma ha ka Sngi Palei u la leit ban jngoh ïa ka Purakhasia bad ki jaka ba marjan ban shim jingkheiñ halor ka jinglong-jingman namar ka jingshlei um kaba dang shen hapoh ka thaiñ.
U Sangma u la lum ruh ïa ka jingïalang khmih bniah bad ki ophisar ka distrik bad ka Block ha ophis jong ka Purakhasia Block kaba ha Puran Bazaar.
Ha kajuh ka por, u la ïakren bad ki nongshong shnong bad kular sha ki ïa ka jingkyrshan na ki bor distrik bad ka Sorkar kumjuh.
U Myntri Rangbah u la ong ruh ba nalor ki ïing kiba shah ktah, bun tylli ki pung, ki jingthung-jingtep bad ki kper soh ki la shah pynjulor lut baroh.
U la ban jur ba ka tnad ka rep ka riang bad ‘Horticulture’ lem bad kiwei-kiwei ki tnad ba dei khmih kin sa treilang ha ka ban pynbiang jingïarap sha kito kiba shah ktah.
Na ka liang jong u, u la jurip ruh ïa ka jaka lum um hajan rud wah ha Purakhasia bad ïa ka jingkieng ba pynïasoh ïa ka Wagigitok sha Akimpara kaba ïaid nalor ka Wah Grim.
Shuh shuh haba phai sha ki shnong Aikinpara bad Posenggagre, u Myntri Rangbah ka Jylla u la pynlong ïa ka jingïalang paidbah ban sngap ïa ki jingpynsngew jong ki bad kular sha baroh ki lad jingïarap na ka Sorkar bad ki heh ophisar.
Nalor kane, u la leit jurip ruh ïa ka jingkieng Thallang ha Angalangre bad ïa ka jingkieng kaba la khyllem ha Rimrangpara kaba ïaid nalor ka Wah Norang.
Ha Rimrangpara, u Myntri Rangbah lem bad ka kynhun jong u ki la hap ban ïaid lyngba ka um na shiliang sha shiliang namar ka jingkhyllem noh jong ka jingkieng.
