Nongpoh, Risaw 10
Ka District Hub for Empowerment of Women jong ka Ri-Bhoi District kaba dei ka shnat treikam hapoh ka Ministry of Women and Child Development (Department of Social Welfare) lyngba ka Mission Shakti mynta ka sngi ka la lah ban pynlong ïa ka jingrakhe kyrpang ïa ka sngi jong ki khynnah kynthei ha ka pyrthei ïa kaba la tip kum ka ‘International Day of the Girl Child’.
Ha kane ka jingrakhe kaba la pynlong ha IVCS, Umdihar la wan ban ïadon ryngkat da u Bah Orville I. Massar, Deputy Commandant jong ka Meghalaya Police 6th Battalion kum u kongsan ha ryngkat ka jingdonlang ka Kong N.F. Sun, District Social Welfare Officer ka Ri-Bhoi District, ka Kong S.M. Bang, District Programme Officer ka ICDS Ri-Bhoi, ki ophisar bad nongtrei ka District Hub for Empowerment of Women, ki khynnah skul kynthei, ki longkmie bad kiwei-kiwei.
Ka Kong N.F. Sun ka la pyntip ruh ba nalor ka jingpynlong ïa ki prokram bapher-bapher kum ka ‘Self Defense Training’, ka jingshondur hapdeng u kpa bad la ka khun (father-daughter selfie), ka jingthung dieng ha ka kyrteng jong ka khun kynthei bad ki jingïalehkai skit ban pynshai paidbah kumno ban ai bor shuh-shuh ïa ki khynnah kynthei, ka thong kaba kongsan jong kane ka ‘Mission’ ka dei ban pyntikna ïa ka jingim ka jong ki kynthei, ka jingïada ïa ki, nalor kiwei.
Na ka liang u Bah Orville I. Massar haba kren ha kane ka sngi kum u kongsan u la ai jingïaroh halor ka jinglah ban pynlong ïa kum kine ki jait prokram kiba ai jingmyntoi shi kat dei ïa ki khynnah rit bad ki khun samla ba kin ïoh ka jingtip bad jingshai ha ka jingim jong ki bad ba ki kmie ki kpa ki dei ban pynshlur ïa ki khun jong ki ban ïashim bynta ha kum kine ki jait prokram.
Utei u heh pulit u la kyntu ruh ïa ki khynnah halor ka jingdonkam ban nang kumno ban jied ïa ki paralok kiba bha bad ban kiar na ki kam sniew khnang ba ka jingim jong ki kan ïaid beit ïaid ryntih bad kin poi sha ka thong kaba ki angnud.
Ka jingkynrei jong u drok bad ka jingbun jong ki khynnah kiba ngop ha une u jingdih uba la ktah shi kat dei ha ka imlang ka sahlang, ka dei kawei pat ka mat kaba na ka liang une u heh ophisar u la ban jur ba ki khun samla ki dei ban kiar na kiba kum kine ki jingsniew kiba pynjot ïa ka longïing-longsem da kaba ong ba ha u drok, ym don sor…ym don nongkyndong bad ym don ba riewspah…ym don ba duk.
Sa kawei ka mat kaba u Bah Orville I. Massar u la kren ha kane ka sngi, ka dei halor ka jingdonkam ban don ïa ka jingmut jingpyrkhat kaba koit kaba khiah naba kane ka mat ka dei ka bym ju da kham ïakren than ha ka imlang-sahlang bad kaba long donkam haduh katta-katta ym tang ïa ki khynnah hynrei wat ïa ki kmie ki kpa ruh ba kin don ïa ka por ban ïasyllok bad ïakren bad la ki khun ki kti na ka por sha ka por, khamtam haba ki ïohi ïa ka jingpher ha ka jinglong jong ki khun ki kti ki jong ki.
Shuh shuh utei u ophisar, u la kren halor ka jinghap ban nang kumno ban pyndonkam ïa ki ‘mobile phone’ ha kum kane ka juk ‘social media’, naba ha ka ki don shibun ki jingsniew bad ki jingbha ruh kumjuh da kaba kyntu ïa ki khun samla ba kin pyndonkam ïa kine ki ‘social media’ na ka bynta ban pynkhlaiñ ïa la ka jingnang-jingstad bad ka jingmut jingpyrkhat, ym ban shu pyndonkam bakla lane leh ïa kiei-kiei ki bym ai jingmyntoi bad ki bym tei satia ïa ka jingim lashai lashisngi.
