Shillong, Risaw 11
Ka shlem treikam u District Sports Officer (DSO) Ri Bhoi District ha ryngkat ka jingïatrei lang bad ki bor pynïaid district jong ka Ri Bhoi, kin pynlong ïa ka jingïakob mareh ba la tip kum ka Freedom Run ha ka 19 tarik mynta u bnai ha ka por 6:30 mynstep.
Ki lynti ban mareh kin sdang na Ri Shat Sngi Orchid Resort kaba ha Umïam ha kaba yn ïaid sha Lad jingkieng Umroi sha ICAR (water point) ban pynkut ha Meghalaya State Fisheries Research & Training Institute kaba ha Mawpun Kshaid.
Na ka liang kitei ki shlem treikam ki la wer ïa ki nongmareh shynrang bad kynthei kiba 14 snem shaneng ba kin wan shim bynta ha kane ka jingïakob mareh kaba 5 kilometer. La pynkhreh ruh ïa ki khusnam na ka bynta ki nongjop ha kaba kiba wan ba nyngkong kin ïoh T. 5000, ba-ar kin ïoh T. 4,000/- bad balai kin ïoh T.3,000/-. La pynkhreh ruh ïa ki song pisa ba mar T. 1000 na ka bynta kiba la rangbah kiba la 50 snem shaneng.
Ki nongshim bynta ki lah ban pynrung kyrteng ïa lade ha ka shlem treikam jong u DSO kaba ha Nongpoh naduh ka por 10 baje mynstep haduh 4 baje janmiet lane ha Bhoirymbong C&RD Block ha ka 16 bad 17 tarik mynta u bnai (Phone No. 9863019639, 9366841474).
