Shillong, Risaw 11
Ka Indian Olympic Association (IOA) ka la jied ïa ka Uttarakhand ban pynlong ïa ka lympung ïalehkai 38th National Games kaba la thmu ban sdang naduh 28 tarik u Kyllalyngkot haduh 14 tarik u Rymphang 2025.
Kane ka jingpynbna ka dei ka jingjop kaba khraw na ka bynta kane ka jylla, namar ba kan pynlong ïa kane ka jingïalehkai kaba heh jong ka ri ha ka sien kaba nyngkong, nangta yn bud sa ka Winter Games ka ban sa long shen, shabar jong ka Jammu & Kashmir bad Ladakh ha ka sien kaba nyngkong.
Ka 37th National Games kaba la long ha Goa naduh 25 tarik u Nailur haduh 9 tariku Naiwieng jong u snem 2023, ka la plie lad ïa ka jingkylla kaba kongsan jong ka Uttarakhand ban pynlong ïa katei ka lympung.
Ka Uttarakhand ka long ka jylla kaba pawnam na ka bynta ka jing-itynnad jong ka mariang bad ka kam jngoh-kai, hynrei mynta ka kynti kan sa long kaba paw ha ki kam ïalehkai da kaba kan ïoh ban pynlong ïa ka National Games. Kane ka lympung kan long kum ka rynsan ban pyni ïa ki sap ïalehkai na kylleng ka ri India bad ban pynroi shuh shuh ïa ki jingïalehkai jong ka Uttarakhand.
Wat la ïa kane ka lympung ïalehkai la dep ban pynbna da ka IOA, hynrei ha kaba ïadei bad ki jaka, ki jingïalehkai bad kiwei ki prokram la khmih lynti ban pynthikna ha ka jingïalang General Assembly jong ka IOA ka ban sa shong ha ka 25 tarik mynta u bnai.
