Shillong, Risaw 11
Ka jingbteng jong ki kam tuh ka ïai jia na kawei ka sngi sha kawei pat. Ïa kane la sakhi biang ha kine khyndiat sngi ba la leit ba ka la don biang ka jingshah prong tuh jong kawei ka dukan bad ka skul.
Katkum ka khubor kaba la ïoh na ki pulit la ong ba ka samla Banrilidor Nongkynrih ka la ujor ba ha ka 2 tarik mynta u bnai, ki runar bym lah ban ithuh ki la kyndang bad prong tuh ïa ka dukan jong ka, kaba don ha Riatsamthiah Block-II, Shillong bad ban ïoh rah ei ïa ki marbam kiba shongdor haduh kumba T.25,000 eiei.
Ha kawei pat ka jingjia, ka Headmistress jong ka Albin Lamare Memorial Secondary School, Nangbah ha West Jaiñtia Hills ka la ujor sha ki pulit ba ha ka 7 tarik mynta u bnai, ki runar bym lah ban ithuh ki la ïoh ban tuh ïa kawei ka CPU, ar tylli ki ‘inverter battery’ bad kawei ka projector na ka building jong kane ka skul.
Ha kawei pat ka khubor shah tuh, ka Legitha Momin ka la ujor ba ha ka 7 tarik mynta u bnai ha ka por kumba 2.30 shiteng synñia, ki runar bym lah ban ithuh ki la tuh ïa ka kali Mahindra pick-up (ML06-8560) jong ka na ka shnong Rongjeng Chigisim kaba ha East Garo Hills.
Ha kaba ïadei bad kine ki kam shah tuh bad hadien ba la ïoh ka jingujor na ka liang jong ki pulit mynta ki dang pynlong ka jingtohkit ban lap ïa ka jingshisha bad ruh ban thwet ïa ki briew kiba donkti.
