Shillong, Risaw 11
Ka lympung ïalehkai First Division Football Tournament 2025 ba la pynïaid da ka Tyrsad Area Sports Associsation (TASA) ka la nangjam shaphrang ha kaba ka Mawlum Tyrsad SC bad ka Mawponghong SC ki la ïoh jingjop ha ka Sngi Thohdieng ha madan Tyrsad.
Ha ka jingïakhun kaba nyngkong, ka Mawlum Tyrsad ka la pynliem noh ïa ka Umkaber da 2-1 kol. Ïa kine kol la thep da u Ebestar Khongsit ha ka minit kaba 4 bad ïa kawei pat la pynbud da u Banshem Khongsit (60). Na ka liang ka Umkaber ka la lah ban pynphai kylla lyngba u Meïaishan Gidon (44).
Ha kawei pat ka jingïakhun kaba ar, ka Mawponghong SC ka la jop da 2-0 kol ïa ka Thainthynroh SC. Ïa kine kol la thep da u Careson Biram ha ka minit kaba 28 bad Precious Jala ha ka minit ba 69.
Kane ka lympung kan bteng biang ha ka 15 tarik ha kaba ka jingïakhun kan long hapdeng ka Laitmawhing SC pyrshah ïa ka Wahlyngkien Sunei SC ha ka por 12:30 mynsngi bad ka Umkseh SC ïa ka Pomsanngut SC ha ka por 3 baje janmiet.
