Shillong, Risaw 13
Ka Voice of the People Party (VPP) ka la pynkut ha u bnai ba la dep kata ha u Nailur 2024 ban phah ïa ki kyrteng na bynta ban pan tiket ban ïakhun ïa ka ilekshon MDC sha Jaiñtia Hills Autonomous District Council (JHADC).
Katkum ki khubor ba la ïoh, la ïathuh ki la don baroh 29 tylli ki konstitwensi kiba la pan tiket na ka VPP ban ïakhun ïa ka ilekshon MDC kaba ka sorkar jylla kan sa pynbna noh shen hadien ba ka la pynjlan arsien ïa ka ilekshon namar ka jingpynbeit ïa ka jingdon ki konstitwensi.
Ki khubor ki ïathuh ba ha East Jaiñtia Hills District ki la don kumba lai tylli ki konstitwensi kiba don tang marwei kiba pan tiket hynrei ïa mynta ki dang buhrieh ïa ki kyrteng.
Ha West Jaiñtia Hills District ruh ki don ki konstitwensi kiba don tang marwei kiba pan tiket hynrei ka State Election Committee kan hap ban bishar bniah biang.
Shuh shuh ki khubor ki la pyntip ba hadien ba ka State Election Committee ka VPP ki la shong bishar bniah ïa kine ki 29 tylli ki konstitwensi lada ki lap ba ki don ki kyrtong kim da biang ki lah ban khot biang sa shisien.
Ki khubor ki ïathuh ba ka VPP kan jop bun ngut ki kyrtong ha kane ka ilekshon MDC lada ki paidbah ki dang ieid kumba ki ai jingkyrshan pura ha ka ilekshon MP ba dang shu dep.
Ka VPP mynta ka hap ban ïakhun pyrshah ïa ki ar tylli ki seng saiñ pyrthei kiba bat mynta ïa ka bor synshar ha JHADC, kita ka NPP bad UDP kiba dei ruh ki seng kiba bat ïa ka bor synshar hapoh ka sorkar jylla.
