Shillong, Risaw 13
Ar ngut ki nongïalam ka Shooting Association of Meghalaya (SAM) ki la long napdeng kiwei pat napoh ka ri kiba la shah thung kum ki dkhot hapoh ka Organizing Committee na ka bynta ka ISSF World Cup Final 2024 (Rifle/Pistol/Shotgun) ban pynlong da ka National Rifle Association of India ha Dr. Karni Singh Shooting Ranges, New Delhi ka ban sdang naduh 13 haduh 18 tarik mynta u bnai.
Kine ki kynthup ïa u Bah John F. Kharshiing, Vice President ka NRAI bad uba long u President ka SAM bad u Bah Neil Sootinck, Executive Body Member ka NRAI bad u General Secretary ka SAM.
Ïa kane ka lympung yn wan ban plie da u Myntri ka tnat ïalehkai jong ka Sorkar Pdeng u Dr Mansukh L. Mandaviya ha kaba yn ïadon lang u Luciano Rossi, President ka International Shooting Sports Federation (ISSF) kum u symbud kongsan bad u Raninder Singh, Patron, u Kalikesh Narayan Singh Deo, Chairman, u K. Sultan Singh, Organising Secretary nalor kiwei pat.
Ka jingïalehkai kan sdang ha ka 15 tarik ha kaba ka 10m Air Rifle jong ki kynthei kan long ka jingïakop siat kaba nyngkong eh ha ka por ba la buh bad bud sa ka jingïalehkai ki shynrang.
Ha kane ka lympung yn wan shim bynta da 131 ngut ki nongsiat ba pawnam jong ka pyrthei na ki 37 tylli ki ri kynthup ïa ki nongjop ha ka Olympic bad kiba long ki paw mynta u snem. Kin don 23 ngut ki nongïalehkai ba paw jong ka India ki ban shim bynta ha kane ka lympung.
