Agartala, Risaw:
Ki pulit jong ka tnat Government Railway Police ki la kem ïa 257 ngut ki bar jylla ha Tripura, 239 ngut ki nong Bangladesh bad 18 ngut ki Rohingya haduh ka 30 tarik, Nailur jong une u snem, la ïathuh u heh pulit.
Haba ïakren bad ki nongthoh khubor ha Agartala, u Deputy Superintendent Soumen Sarkar u la ïathuh shuh shuh ba la kem ruh ïa 54 ngut ki nongkhaïi martuh kiba dei ki nong India ki la shahkem naba ki la shah kynnoh ba ki la ïarap ha ka ban pynsuk ban rung beaiñ ha ki bynta khappud jong ka Bangladesh.
Haba kylli halor ka jingwan buhai shnong ki bar ri, une u heh pulit u la pynshai da kaba ong ba kine ki briew ki rung be-aiñ lyngba ki jaka barit ha khappud India-Bangladesh, wat la ki pulit ka jylla bad ki jong ka tnat GRP ki dang peitngor bha ha ka ban buddien ïa ka jinglong jingman.
Ha u Nailur, ki la don palat 70 ngut ki nong Bangladesh kiba la shahkem ha ki shipai ka tnat Border Security Forces katba ki dang pyrshang ban rung beaiñ sha ki jaka kiba hap hapoh ka ri India.
La lap ïa kawei ka metïap jong kawei ka samla lud kaba dei ka nong Bangladesh kaba dang 16 snem ka rta ha ryngkat ki dak mynsaw na ka jingshah siat kuli hajan ka khappud Laitapura kaba don ha Kailashahar ha Unakoti distrik ha ka 3 tarik, Nailur.
La aiti noh ïa ka met jong ka sha ki Border Guards Bangladesh bad ki pulit ka Bangladesh hadien ba la dep leh ïa ka Postmortem.
Ki jingwan rung tuh ki jia wat hapdeng ka por ba don ka jingpahara kaba jur ha shilynter u pud u sam jong ka International Border, hadien ba ka la don ka jingpyntikna na ka sorkar kmie ba ki pud jong ka ri ki long kiba shngaiñ bad ba kim shym don jingshah ktah na ka jingwan rung tuh beaiñ jong ki bar ri, khamtam eh ha kum kine ki por ba dang dep jia shen ka jingïakynad ha Bangladesh.
U Patel Piyush Purushottam Das, u Inspector-General, ka BSF, Tripura Frontier dang shen u la leit jngoh ïa ki jaka khappud ba don harud wah kiba dang duna ha ka jingker kynroh ban bishar bniah ïa ki lad jingïada ba la pyntreikam da ki heh ba dei khmih.
U la ban jur ban pyndonkam da ki tiar bym lah ban pynïap briew ban khanglad ïa ka jingkhaïi tuh shabar u pud u sam.
Ka Tripura ka la don ka bynta kaba kongsan ha ka thma pyllaitluid jong ka Bangladesh kaba la neh khyndai bnai pyrshah ïa ka Pakistan, kaba la kut noh hadien ba ki Mukti Bahini ba la ïalam da u Sheikh Mujibur Rahman ki la pynbna ïa ka jinglaitluid ha ka 26 tarik, Lber, 1971.
Ha katei ka por ka Tripura, ka don 1.5 million ngut ki nongshong shnong, ka la ai jaka sah ïa 1.6 million ki poiwir kiba wan na East Pakistan, kaba la palat ïa ka jingbun briew jong ka.
Ki shipai Pakistan ki la aiti noh ïalade ha ki shipai ba ïatreilang jong ka Bangladesh bad jong ka India ha ka 16 tarik, Nohprah, 1971.
