Baghdad, Risaw:
U nongmihkhmat ba hakhmat eh jong ka Iran, ha ka Sngi U Blei, u la kular ba kan ym don jingma eiei ia ka Iran naba ka tnat ïada jong ka ri kan shim jing-kitkhlieh ban ïada ïa la ki briew bad ia la u pud- u sam. Kane ka long katba ka Iran ka dang pynap bad pynkhreh ia ka jingsiew kylliang jong ka Israel, halor ka jingshah thombor ha ka Iran da ki spah tylli ki ‘namding ha kine ki khyndiat taiew ba la leit. Kumta, u Abbas Araghchi u la ong ba wat la ka Iran ka la pyrshang shibun ha kine ki sngi ba la dep ban tehlakam ïa ka thma kaba jur bha ha ka thaiñ Middle East, hynrei u la pynshai ba ka Iran kan ym kynran dien ne pyndem ia ki rai kiba ka la shim bad kane ka jingleh jong ka kan ym buh jingma ia ki paidbah jong ka Iran namar ka tnat ïada jong ka Iran ka sngewthuh ia kaei kaba ka dei ban leh.
Namar la ong ba ka Iran ha ka 1 tarik u Risaw, ka la leit thombor da ki spah tylli ki ‘namding sha Israel bad la ong ba kane ka la pynbitar jur ia ka Israel bad na ka liang ka Israel ruh ka la byrngem ba kan sa pynphai kylliang da ka kput kaba jur kumba ka leh ia ka Gaza bad ia ki lehnoh Hezbollah jong ka Lebanon. Hynrei, kane ka jingleit thombor jong ka Iran pyrshah ia ka Israel, ka long ban pynhiar kput halor ka jing-leit thombor jong ka Israel sha Iran ha ki bnai ba la leit.
, ha kaba ki heh nongialam jong ka Iran bad uwei u heh ka Hamas uba la khlad noh ha ka jingleit thombor jong ka Israel hapoh u pud- u sam jong ka Iran, katba utei u heh u dang leit ban sakhi ia ka jingpynbam smai ia u President ba thymmai jong ka Iran.
Haba iadei bad kane, la ong ba u Myntri kam poh ïing jong ka Israel, u Yoav Gallant, u la byrngem ba ka jubab jong ka Israel, kan long kaba shyrkhei bad kaba ka Iran kam pat ju iohi mynno- mynno ruh.
U Ali al-Moussawi, uba dei u nongai jingmut ha ka saiñ pyrthei jong u Myntri Rangbah duh ka Iraq, ha ka jingiakren jong u bad ki nongthoh khubor, u la iathuh ba ka jingwan jong u Araghchi ka long shi bynta jong ka jingpyrshang ban tehlakam ia ki kam thombor bad ki jingiakynad ha katei ka thaiñ Middle East bad hadien jong ka Baghdad, u Araghchi un leit sa sha Oman pat ban iakynduh ia ki heh nongialam jong kane ka ri na ka bynta ki kam ba dang sah.
Ka Qatar pat ka la long ka nongpyniasuk ia ki jingiakren sangeh thma hapdeng ka Israel bad ka Hamas hapoh ka nongbah Gaza.
Ha ka jingiakren kaba dang shen, u Araghchi u la kren shai ba ka Iran kam shym kwah ban ïakhun thma bad ka Israel lymne bad kiwei pat ki ri ba marjan jong ka hynrei kam don jingsalia pat lada kiwei ki ri ki kwah ia ka thma. Kumta ruh u la ong ba ka Iran kan long ba la pynkhreh lypa ban ialeh pyrshah ia kino-kino ki jingma kiba ap ban pynthut ia ka shongsuk-shongsaiñ jong ka.
