Niort, Risaw:
Katkum ki khubor, la iathuh ba 4 ngut kiba shong ha kawei ka kali ilektrik ‘Tesla’, ki la duh ei noh ia ka jingim hadien ba katei ka kali ka la kem ding khlem da pyni ia kano-kano ka dak jingthut ne jingmaham katba kitei 4 ngut ki dang don ha lynti ha ka thaiñ Sepngi jong ka France ha ka Sngi U Blei.
Kane ka jingjia ka la jia ha ka nongbah Niort jong ka France. Kitei 4 ngut ki kynthup ia u nongñiah jong katei ka kali lem bad 3 ngut kiba dei nongleit jingleit kiba shong ki la duh noh ia ka jingim ha katei ka jingjia kaba khlem poi pyrkhat. Kitei 3 ngut la ong ba ki dei ki nongtrei jong kawei ka dukan bam ‘Restaurant’ ha ka thaiñ Melle.
Na ka liang ki pulit ki dang wad bniah ia ka daw tynrai ban lap ia ka daw jong ka jingkem ding katei ka kali ilektrik bad yn hap ban wad bniah ruh ioh lehse ka rukom shna bad rukom pynïaid ia ki kor ki bor jong katei ka kali ki long ki bym biang bad kaba buh jingma ruh ia ki paidbah kiba pyndonkam ia kum kitei ki jait kali.
Hynrei, la ong ba ha katei ka jingjia, katei ka kali ka la leit rat ia baroh ki dieng post ilektrik bad ki dieng pynieng ‘signboard’ kiba don harud ka surok, ha ka jingstet kaba la palat.
Kaba sngewsih ka long kiba shong hapoh jong katei ka kali, ki la dep khlad lut baroh ha ka por ba ki nongiarap bad ki kynhun sumar ki leit poi sha katei ka jaka.
Namar katkum ka jingpeit bniah jong ki tnat ba dei khmih ha ki laiñ shna kali, ia katei ka kali (Tesla) ba la wanrah da u heh spah ka pyrthei- u Elon Musk, la pyrshah da kiba bun ki tnat namar ka jingbym long shngaiñ ban pyndonkam ia katei ka jait kali.
Kumjuh ruh ha u snem 2018, kawei ka longïing ka la shu iap ei ha kum kane kajuh ka jingjia ba ka kali ‘Tesla’ Model ‘X’ ka la thut bad leit hap sha ki lum ka Silicon Valley ha utei u snem.
Kum ban shu kdew ha u Nohprah mynshem snem kane ka kompeni ka la shah pyrshah na kiba bun ki kompeni shna kali jong ka pyrthei namar ka jingbym shngaiñ jong katei ka jait kali ia ki paidbah kiba pyndonkam ia ka.
