Guwahati, Risaw:
Ka kynhun Special Task Force (STF) jong ki pulit ka Assam hynnin ka step ki la ïoh ban kem ïa uwei u briew bad kurup ruh ïa u drok uba la kot lajan `. 4.5 klur haba la khmih bniah na u.
Haba la ïoh jingtip shaphang ka jingdon jong ki briew kiba thmu ban shalan ïa u drok na Nagaland sha Guwahati ha ka trok, ka kynhun STF ka la pynlong ïa ka jingkhmih bniah bad ïoh ban bat ïa kawei ka kali kaba don ïa u Registration number AS01-RC-2336, ha Jorabat kaba ha Kamrup Metropolitan distrik jong ka Assam.
Ha ka por ba la pynlong ïa ka jingkhmih bniah hapoh kane ka trok, ka kynhun STF ka la lap ïa 45 tylli ki song plastik sabon kiba don ïa 537.2 grams u Heroin.
Ym slem hadien kane, ka kynhun ka la kem noh ïa u nongñiah jong ka trok, ha kaba la pynshisha ba u la thmu ban shalan ïa une u drok.
Ïa ne u briew uba la shahkem la tip kyrteng kum u Rananjay Mandal (46), uba dei u nongshong shnong jong ka Barpeta distrik kaba don ha Assam, une u shu sah shipor ha ka thaiñ Basistha kaba don ha Guwahati.
Ki pulit ki la shimti ban pynlong ïa ka jingtohkit ha kaba ïadei bad kane ka jingjia.
