Manhattan, Risaw:
U Principal jong ka skul na Manhattan, u la shah pynngat noh hapoh ki kyndon aiñ kiba ia dei katkum ka jingleh jong u hadien ba la lap ba u la leh ieid bad leh khlemakor ia kawei ka khynnah skul jan manla ka sngi da kaba u ju khot ieid ruh ia ka kum ka ‘baby’ bad ka ‘princess’. Katkum ka jingujor jong ki bahaiing katei ka khynnah skul, la ong ba utei u principal uba la ithuh kyrteng kum u Bret Kimmel, ba shong ba sah ha Maryland, u ju leh jan bad pynbor ia katei ka khynnah ba kan iathiah bad u wat ha ka sngi shuwa ba kan kot noh syndon sha ka 18 snem ka rta.
Katkum ki sabut bad ki kaiphot ba la ioh lum da ka ïingbishar ha kane ka por, la ong ba utei u principal jong katei ka skul, u la bud-dien bad peit bniah bha ia katei ka khynnah naduh ba ka dang pule ha ka kyrdan klas VIII. Kane ka la jia ha ka skul Washington Heights Expeditionary Learning School ha ki shiphew snem ba la leit.
La ong ba utei u principal u ju phah ia ki message da ki ktien khlemakor bad ki ktien kiba long be-aiñ ia ki khynnah kiba hapoh 18 snem bad u ju phah ruh ia ki dur lyngkhuit jong u sha katei ka khynnah. Kane ka long hadien ba katei ka khynnah ka la phla ia kine ki jingleh jong u baroh hakhmat ka ïingbishar jong ka Manhattan ha u Iaiong. La ong ba utei u nonghikai um shym la sangeh ban leh ia kane ka kam be-aiñ wat hadien ba ka hynmen jong katei ka khynnah ka la leit ban byrngem bad maham ia u ba um dei ban pynthut ne leh eiei ia ka para jongka ha kitei ki snem 2012.
Shuh shuh ruh katei ka khynnah ka la phla ba utei u nonghikai u ju leitshaw bad leit buh skul hi ia ka naduh ba ka dang pule ha ka klas- VIII bad u ju ktah bad leh khlem-akor ruh ia katei ka khynnah ha lynti katba ka dang shong bad u hapoh ka kali shuwa ban poi sha skul lane sha iing.
Namarkata, katei ka khynnah kaba la samla bha mynta, ka la iathuh ba ka daw jong kitei ki jingjia ka long namar ba ka tnat ‘Department of Education’s (DOE) kam shim khia ban ujor lane ban shim jingkitkhlieh haba iohi ia kum kitei ki jingjia ha ki skul bad ki jaka pule.
Namar la shem ruh ba ym shym don ba leit ban ujor eiei sha u Special Commissioner of Investigation ba dei khmih ia ki jaka pule bad ym shym don jingthoh ne jingujor eiei kiba iadei bad ka kyrteng jong utei u principal jong katei ka skul.
Kumta, hadien kitei ki snem kiba ka la lait na katei ka skul, katei ka samla ka la rai ban leit ujor sha ki pulit bad ban rah ia kane ka mat sha ka ïingbishar khnang ba utei u nonghikai un nym iohlad shuh ban leh kumjuh ia kiwei ruh ki khynnah skul kynthei kumba u la leh ia ka ha kitei ki snem kiba ka pule ha katei ka skul.
Kat ia mynta, u Kimmel u trei kum u Education Consultant ha Fort Lauderdale, Fla bad u nongïasaid aiñ jong utei u nonghikai, u la kyntait ia kitei ki jingpharep baroh bad ong ba utei u nongïasaid aiñ u la kyntu ia ka ïingbishar ba kan klet noh ia kane ka mat namar kam long shuh ruh ka mat kaba dang jia shen hynrei kaba la jia naduh ki phew snem mynshwa. La ong ruh ba lada katei ka jingjia ka dei kaba jia shisha, kumno katei ka kynthei kam leit ban ujor baroh shi katta ki snem ba la leit bad balei pat ka kwah ban dang khyllie biang haduh mynta.
Kumta, ka ïingbishar jong ka Manhattan ka la pyntip ba kan dang hap ban phah wad bniah haba iadei bad kane ka jingjia katkum ka jingphla jong katei ka samla bad kumjuh ruh ynda la ioh ban tohkit bniah ia baroh 2 ngut kiba iadon bynta ha katei ka kam.
