Kohima, Risaw:
Ha ka jingïatreilang ba la pynlong ha ka 12 tarik, Risaw, ka tnat shipai Assam Rifles, ha ryngkat ka jingïatreilang ki pulit jong ka Nagaland, da ka jingjop kaba khraw ki la lah ban kem ïa uwei u dkhot jong ka kynhun lehnoh NSCN (KYA) ha Mon, ka jaka sor kaba don ha Nagaland.
Ïa ka jingleit thwet lehnoh la pynlong hadien ba la ïoh jingtip ba la don ka kynhun jong kine ki lehnoh kiba ïaid bad shang ha kane ka thaiñ. Kum shi bynta jong ka jingleit thwet, la pynbiang ïa ka kali da ka kynhun shipai ïada ri ban leit wad ïa ki kali jong ki lehnoh kiba la shah suba.
Ha ka por ba la don ka jingkhmih bniah, la lap ïa kawei ka kali Alto ha kaba la pynsangeh bad kem ïa u dkhot jong ka kynhun NSCN (KYA) ha ryngkat arngut kiwei pat ki briew.
Ki shipai ha ka jingpyntreikam ki la ïoh ban kurup ïa ka pistol 7.65mm bad kiba bun ki kot ki sla kiba ïadei bad ki kam dawa pisa na kane ka kali. Ïa une uba la shahkem ha ryngkat ki mar ba la ïoh ban kurup la aiti sha ki pulit jong ka Nagaland na ka bynta ban pynlong ïa ka jingtohkit.
