Geneva, Risaw:
Ka World Health Organization (WHO) ha ka Sngi Thohdieng, ha ka sien nyngkong eh ka la pynrung ia uwei na ki dawai Mpox hapoh ka thup jong ki dawai ban pynkhiah ia katei ka jait jingpang kaba la kynrei bha ha kine ki sngi khamtam ha ki ri Africa bad la khmih lynti ruh ba kan lah ban pynmih kham bun ia katei ka dawai tika bad ban ioh ban sam paidbah tang ha ka por kaba khyndiat bad lyngkot khnang ba yn lah ban tehlakam noh ia ka jingsaphriang kulmar bad ka jingjur jong ka khlam Monkeypox ha ka pyrthei baroh kawei.
Kane ka jingpynbna na ka WHO ka long ruh hadien ka jingwan mih pyrthei jong une u dawai MVA-BN ba nyngkong eh ha Democratic Republic of Congo (DRC), kaba long ruh ka ri kaba katei ka khlam Mpox ka jur tam palat.
U heh ka WHO, u Tedros Adhanom Ghebreyesus ha ka jingkren jong u ha ka Sngi Ba-ar, u la ong ba kane ka long ka sien jam kaba nyngkong eh ba ka WHO ka la shim bad ka la shim khia ruh ban ioh ban tehlakam noh ia katei ka jingpang khlam kaba ishyrkhei bad kaba kiba bun ki ri ki la shah ktah ha une u snem.
Hynrei, u la ong ba ka pyrthei ka la donkam kyrkieh ia une u dawai bad la donkam ruh ba pymmih shibun bah utei u dawai tika khnang ba yn lah ban sam bad pynioh sha baroh kito ki paidbah jong ki ri kiba la kham shah ktah jur bha ha kane ka jingpang khlam.
Namar la ong ba ka long ka sien ba nyngkong ia ka WHO ba kan pynrung ia une u dawai tika hapoh ka thup jong ki dawai ban ïakhun pyrshah ia katei ka jingpang khlam Monkeypox kaba ki ju tip mynta kum ka ‘Mpox’.
Kumta, kane ka jingai jingbit jong ka WHO ban pyndonkam ia kane ka jait dawai MVA-BN, kan iarap ban pynsuk ia kito ki sorkar lane ki tnat jong ka pyrthei kiba kwah ban thied ia kitei ki dawai tika ban ioh ban pyndonkam bad ban pynkhiah noh ia kito ki paidbah kiba la shah ktah ha katei ka khlam baroh.
Kane ka jingpang Mpox, kaba la ju tip mynshwa kum ka Monkeypox, ka dei ka jait jingpang kaba ju pur sha u briew lyngba kito ki mrad kiba la ioh lypa ia katei ka jingpang. Hynrei, kane ka jingpang ka pur pat na uwei sha uwei u briew lyngba ka jing-iashongkha lane ka jingiathiah lok.
Kane ka jingpang ka wanrah ia ki dak jingshitom kum ka jingshit met, suh khriat, pang ki doh-ksah bad ka jingat lane prum ka sniehdoh. Kane ka jingpang ka lah ruh ban ktah jur lane wanrah wat ia ka jingiap ha kito kiba tlot ka bor met lane kiba katei ka jingpang ka kham ñion tyngeh.
Namarkata, la ong ba ka WHO ha une u bnai ba la lah, ka la pynbna ia kane ka jingpang khlam kum ka jingpang ka bym long shuh ban pynslem ne ban leh sting bad ba la donkam ruh ban tehlakam noh kloi shuwa ba kan pur bad saphriang sha ka pyrthei baroh kawei kumba long ka khlam Covid-19 ha ki snem kiba la leit.
Namar la ong ba ka Democratic Republic of Congo (DRC), ka la sakhi ia kumba 22,000 tam kiba ioh kem ia kane ka jingpang hapoh katei ka ri bad 716 ngut ki dei kiba la khlad noh syndon hadien ba ki la shah ktah ha kane ka jingpang naduh kaba sdang jong u Kyllalyngkot jong une u snem.
Tad haduh kane ka kynti, la don kumba 2,00,000 bilor ki dawai tika ba ka European Union ka la dep phah baroh sha katei ka ri, ha ryngkat bad ki 50,000 bilor ki dawai tika ba la phah na United States.
