Shillong, Risaw 15
Ka Wahlyngkien Sunei SC bad ka Pomsanngut SC ki la ïoh jingjop ha ka lympung ïalehkai First Division Football Tournament 2024 ba la pynïaid da ka Tyrsad Area Sports Association (TASA) ha ka Sngi Ba-ar ha madan Tyrsad.
Ha ka jingïakhun kaba nyngkong ka Wahlyngkien Sunei ka la pynliem noh ïa ka Laitmawhing SC da 4-1 kol. U Wilky Khongwar u la thep ar kol ha ka minit kaba 34 & 48, katba ïa kiwei pat la thep da u Newshailang Lyngdoh (15) bad u Aiboklang Khongwar (21).
Haba phai sha kawei pat ka jingïakhun ka Pomsanngut ka la jop da 3-0 kol ïa ka Umkseh SC na ka bynta ban khur ïa ki 3 point na ki ar sien ïakhun. U Rangkatbor Kharbani u la thep ar kol ha ka minit kaba 35 & 78 bad ïa kawei pat la thep da u Kerban Kharbani ha ka minit kaba 29.
Katei ka synjuk ka la pynbna ba ka jingïakhun jong ka Third Division kan long ha ka 18 tarik (sngi Thohdieng) hapdeng ka Nongbri SC pyrshah ïa ka Mawsinhshad SC ha ka por 12 baje. Katba ka Second Division kan long hapdeng ka Pyndenumbri SC pyrshah ïa ka Mawkynroh SC ha ka por 2 baje, katba ka Mawrohroh SC ïa ka Ramklang SC ha ka por 3:30 janmiet.
