Shillong, Risaw 15
Ka jingjot rathai jong ka surok National Highway-6 ha ka thaiñ Narpuh, East Jaiñtia Hills District ka la long kaba ishyrkhei haduh katta-katta ban peit namar ba ka la dap sa tang da ki thliew-ki syar ba heh hapdeng ka surok kaba la long ruh kumba ym don satia ki nongmihkhmat kiba lah ban weng ïa kane ka jingeh bad ki mawjynthut jong ki paidbah ha kane ka thaiñ. Lada peit ïa ka jinglong-jingman jong ka surok, ki maw bad ki nar rod ki la rkhie bad kren briew lut bad ki kali ruh ki la hap ban shah kynting sha kadiang bad sha kamon.
Ïa kane ka jingjot rathai jong ka surok ha katei ka thaiñ kaba ym shym la don ba kitkhia, la nang ïai ban shuh-shuh ha kane ka khyllipmat da ka Hynñiewtrep Integrated Territorial Organisation (HITO) Narpuh Circle kaba la leit ban jngoh bad ïaid lyngba katei ka surok naduh na Lumshnong haduh Umkiang bad kaba long ruh shisngi shwa ba u Vice-President ka Ri, u Jagdeep Dhankar un wan ban ïuhkjat sha nongbah Shillong bad ha ki bynta jong ka thaiñ Sohra ha ka 16 bad 17 tarik u Risaw 2024.
Katkum ki durkhih (video) la lah ban sakhi ba ka jinglong-jingman ka surok ha bynta jong ka Narpuh, ka la ishyrkhei shisha ka jingsniew, kaba la pynsyrtok shi katdei eh ïa ka leit ka wan, ym shuh tang ki kali rit hynrei wat ki kali heh ruh ki la shem shitom. Ka jingsniew shaba palat liam jong kane ka surok, ka la ktah shibun ruh ïa ki nongshong shnong ka thaiñ Narpuh khamtam kiba sah shajan jong ka surok, kiba la hap ban bam tang u pum pum bad ka ktieh jan manla ka por.
Halor kane, u samla Hardy Lamare, Vice President ka HITO Narpuh Circle, u la ther tyngeh ïa ka Sorkar Jylla da kaba ong ba ka dei tang ha ka thaiñ Narpuh ba ki paidbah kin lah ban sakhi ïa ki pung dohkha ba bun jait bad ki shap (map) jong ki jylla bapher-bapher lyngba ka surokbah kaba don ha Narpuh.
“Ngi ïohi ba ki don shibun ki khohruh-khohram kiba long kum ki pung dohkha hapdeng ka surok, ki don ki ‘map’ jong ki jait pa ki jait ki Jylla hapdeng jong kane ka surok”, ong u samla Hardy.
U samla Hardy u la ong ba bun tylli ki snem bad ki bnai ki lah leit noh hynrei la ïohi ba ka Sorkar Jylla ka khlem treikam eiei satia ha ka ban bha ïa kane ka surok.
U la ong halor ka jingleh kuman ka Sorkar Jylla, ka HITO ka la aipor shibnai ïa ka Sorkar Jylla ban shna pynbha ïa kane ka surokbah bad ong ba lada ka Sorkar kam lah ban shna pynbha bad pyndep ïa ka, ka seng kan sa pynlong da ka jingïakhih paidbah ha ka thaiñ.
Shuh-shuh ha katei ka jingïaid lynti, ka seng ka la rah ruh da ki jingthoh ha ryngkat ka jingpyrta ïa ki sur bapher-bapher bad ban kyrpad ruh ïa u Myntri Rangbahduh ka Ri, u Narendra Modi bad ïa u Vice-President ka Ri ba kin wan ïuhkjat ha ka thaiñ Narpuh ban ïohi ïa ka jingjot rathai jong ka surokbah.
Na ka liang ki dkhot ka seng ki la pynrem ruh ïa ka Sorkar Jylla da kaba kynud ïa ki sur jingrwai ha ryngkat ka jingtem ïa ka tin.
