New Delhi, Risaw:
Ka Sorkar Delhi ha ka Lah Sngi U Blei ka la pynmih ïa ka hukum kaba khang syndon ban pynbthei ïa ki jait bom pataka baroh. Ka sorkar ka la khang ruh ïa ka jingshna, jingbuh bad jingdie ïa ki bom pataka, kynthup ïa ka jingpynpoi lyngba ki jingpynïaid ïew da kaba shu Online. “Kan don ka ‘jingkhang pyrshah ba pura’ ïa baroh ki jait bom pataka ha kaba shna, buh, die (kynthup ïa ka jingpynpoi lyngba ka Online) bad pynbthei ïa baroh ki jait bom haduh ka 1 tarik, Kyllalyngkot, 2025 ha ki jaka jong ka NCT jong ka Delhi,” la ong ka hukum ba la pynmih da ka Delhi Pollution Control Committee kaba hap hapoh ka tnad Environment Department. Ka hukum ka la bthah ïa ki pulit ka Delhi ba kin pyntreikam ïa katei ka jingkhang ha ka rukom kaba pyrkhing bad ban aiti ïa ki kaiphot ba la pyntreikam man ka sngi sha ka komiti.
Ka jingkhang ban pyndonkam ïa ki bom pataka ka la long shi bynta jong ka jingthmu ka sorkar Delhi ban pyntreikam katkum ka Winter Action Plan 2024 kaba don jingthmu halor ka jingïakhun pyrshah halor ka jingjaboh jong ka lyer.
Ha kaba nyngkong, ka sorkar Delhi kan pyndonkam da ki Drone na ka bynta ban peit bniah ïa ka jinglong ka suiñbneng kumba ka long ha kylleng ki jaka bapher bapher kiba shah ktah na ka jingjaboh jong ka lyer ha ka nongbah.
Ka jingthmu pyntreikam ka kynthup ruh ban peit bniah ïa ki jaka ba jur bha ka jingjaboh, ka jingpynmih jaboh jong ki kali bad ka jingher bun jong ki pum-pum, ka jingthang ïa ka sboh bad ïa ki jaboh, ki jaboh ba pynmih na ki karkhana bad ban pynbha khnang ban wanrah ïa ka jingjyrngam bad kiwei pat.
Ka sorkar ka thmu ruh ban wanrah ïa ki jingpyntreikam kiba trei na ïing na ka bynta baroh ar, kata na ka bynta ka sorkar bad ki kynhun shimet, ban sdang ïa ki jingpynkhreh na ka bynta ka skhim Odd-Even bad wad bniah katba lah ban pynhap da ka um kum u slap khnang ban pynher bad ban pynkhuid ïa ki jaboh khamtam ki pum-pum.
U Myntri ka tnad Environment jong ka Delhi, u Gopal Rai, u la ban jur halor ka jingdonkam jong ka jingïatreilang na ki jylla ba marjan ban ïaleh pyrshah ïa ki jingeh jong ka jingjaboh sha shiliang pud, khamtam eh ïa ka jingktah jong ka jingthang bun ha kylleng ki thaiñ ba marjan.
