Shillong, Risaw 15
Ka Kong Ampareen Lyngdoh kaba dei ka nongïalam ka NPP bad ruh ka Myntri Sorkar ka la pyntip ba ka seng ka la ïaid shakhmat bad ban pynkhreh pura ban ïakhun ïa ka ilekshon MLA shiteng samoi ha Gambegre bad ruh ïa ki ilekshon MDC ha Ri-lum Khasi bad Jaiñtia.
“Ka NPP ka dei ka seng, kaba ju pynkhreh bha ïalade ha man ki ilekshon, la ka dei ka ilekshon sha ka ïingdorbar thawaiñ ka jylla, ki District Council ne ruh sha ka dorbar Lok Sabha,” ong ka Kong Ampareen haba ïakren bad ki lad pathai khubor ha ka Lah Sngi U Blei.
Ka Kong Ampareen ka la ong ba kum ka seng kan ïakhun tyngeh ban jop ïa ka ilekshon ha Gambegre namar ha kane ka por, ka jingskhem ha ka synshar-khadar ha Meghalaya ka dei kaba donkam palat.
Haba kylli, ka Myntri ka la ong, “Ngin ym tip kiei ki jingïatai ki ban mih hynrei, ngi shu duwai ba ngin ym ïapait-ïapra hapdeng jong ngi da kaba pynshong nongrim na ki jaidbynriew, ka niam, ki kam bad kiwei kiwei.”
Ha kane ka ilekshon MLA shiteng samoi ha Gambegre, ka NPP ka la pynïeng da ka kurim jong u Myntri Rangbah ka Jylla u Conrad K Sangma, ka Mehtab Chandee Sangma. Ka jingdon jong kane ka ilekshon shiteng samoi, ka dei ka jingiehnoh kam MLA jong u Saleng A Sangma hadien ba u la jop ïa ka ilekshon MP na Tura.
