Guwahati, Risaw:
Ka jingïalang kaba kongsan tam ban wad ïa ki lad ki lynti na ka bynta ban weng ïa ki jingeh halor ka jingïakynad jait bynriew kaba la neh 17 bnai tam ha Manipur, la pynlong ha New Delhi ha ka sngi Ba-ar, la ong ka Union Home Ministry ha ka jingthoh ba la phah.
Kane ka jingïalang ka dei kaba nyngkong eh na ki jingïamir jingmut ba la khot da ka sorkar hadien ba la mih ka jingïakynad hapdeng ki jaidbynriew Meitei kiba bun paid bad ki jaidbynriew Kuki-Zo kiba rit paid ha Manipur ha ka 3 tarik u, Jymmang ha u snem ba la lah.
Ka kynhun jong ki dkhot ba la shah jied jong ka Manipur Assembly, kiba mihkhmat ïa ki jaitbynriew Kuki-Zo-Hmar, Meitei bad Naga, ki la ïakynduh ban ïakren halor ka jinglong jingman kaba mynta ha kane ka jylla kaba don shaphang Shatei-lam- Mihngi.
Ki nongïashim bynta da kawei ka jingmut ki la rai ban kyntu ïa ki briew na baroh ki jaitbynriew ba kin ïaleh katba lah ban kiar na ka jingleh donbor khnang ba “yn ym don shuh ka jingduh ïa ki mynsiem briew ba kordor jong ki nongshong shnong kiba lui lui”.
Ïa kane ka jingïalang la khot da ka kynhun Intelligence Bureau bad la pynbit pynbiang da u Myntri ka sorkar kmie uba dei khmih ïa ka tnat ki kam pohïing u Amit Shah.
Ki MLA jong ka Kuki-Zo kiba la leit sha katei ka jingïalang ki la ong ba ki la mihkhmat na ka liang ki paidbah bad ki dei ka sur jong ki.
Ki jaitbynriew Kuki-Zo, ki la ong, ba ki kwah ïa ka jingsynshar kaba kyrpang ha ka dur jong ka UT ryngkat bad ka ïingdorbar thaw aiñ. Ym lah ban don ka jingïakren ïasuk shwa ban pynurlong ïa kane ka jingdawa, ki la ong. Ka kyrwoh na ka kynhun jong ka Kuki-Zo ka ong,
Ki MLA jong ka Kuki-Zo ki la pynksan ruh ïa ka jingshaniah kaba pura ha ki nongïalam jong ka KNO-UPF bad ki la pynthikna ba kim don kino kino ki jingdawa ba la bynrap palat ïa kiba la dep ban wanrah da ka KNO-UPF.
Ki la kyntu ba ka jingïakren halor ki kam saiñ pyrthei bad ki nongïalam ka KNO-UPF ka la dei ban don bad dei ban buh kham kloi katba lah. Nalor kata, ki MLA ki la pynskhem biang ïa ka nongrim jong ki bad ki la pynpaw ïa ka jingbym kwah ban ïashim bynta ha kino kino ki jingïalang ba ïatreilang bad ki MLA jong ki Meitei bad Naga.
Ki la ban jur da kaba ong ba kum kine ki jingïalang ki dei ban don tang hadien ba la ïa pyrkhat sani bha bad ki paidbah’. Ïa ka jingpynkut ïa kane ka jingïalang kaba la neh saw kynta, ym shym la pynpaw satia sha ki lad pathai khubor.
Napdeng kiba la ïadonlang ha kane ka jingïalang ki kynthup ïa u Lamphang ka ïingdorbar thawaiñ jong ka Manipur, u Thokchom Satyabrata Singh, u MLA u Thongam Biswajit, uba dei na ka jaitbynriew Meitei, bad ki nongmihkhmat na ka jaitbynriew Kuki — Letpao Haokip bad u Nemcha Kipgen, ha kaba baroh arngut ki dei ki Myntri. Ki MLA kiba kynthup ïa u Ram Muviah, u Awangbow Newmai bad u L. Dikho ki la mihkhmat ïa ki jaitbynriew Naga.\
U nongai jinmgut jong ka Norteast Affairs jong ka Ministry u AK Mishra, u Coordinator ka seng BJP ha Northeast bad u MP ka Lok Sabha u Sambit Patra bad kiwei kiwei ki heh ophisar ki la donlang ha kane ka jingïalang, la ïathuh ka tyllong khubor.
