Shillong, Risaw 16
U Secretary ka Meghalaya Pradesh Congress Committee (MPCC), Bah Manuel Badwar u la ong ba ka kyrteng jong uba pan tiket na ka seng ban ïa aireng ha kane ka ilekshon shiteng samoi na Gambegre konstitwensi ka la poi sha ka komiti ba khmih ïa ki kam ilekshon jong ka seng.
“Ka kyrteng ka la leit sha ka komiti. Ka don tang kawei ka kyrteng, tangba ngim pat pyntikna. Ka komiti kan sa shong biang ha kane ka taïew ban wan haba ïadei bad kane ka bynta,” ong u Bah Badwar.
Hashuwa, ka komiti ba khmih ïa ki kam ilekshon jong ka seng ka la dep shong jingïalang teng shisien, u la ong.
Kum ban shu kdew hangne, ka ilekshon shi-teng samoi ha Gambegre konstitwensi kan long ha ka 13 tarik Naiwieng katba ka jingñiew ‘vote’ kan long ha ka 23 tarik Naiwieng.
Kane ka konstitwensi ka la sah thylli hadien ba u MLA ka Congress, u Saleng A. Sangma u la hap ban ieh noh ïa ka jinglong nongmihkhmat hadien ba u la jop bad shah jied kum u MP ka Tura Parliamentary konstitwensi ha kane ka ilekshon Lok Sabha mynta u snem.
Ka National People’s Party (NPP) ka la dep pynbna ïa ka kyrteng jong ka Dr. Mehtab Chandee Sangma, kurim jong u Myntri Rangbah ka Jylla, u Conrad K. Sangma kum ka kyrtong katba ka liang pyrshah – All India Trinamool Congress (AITC) ka la pynbna ïa ka kyrteng jong ka Sadhiarani Sangma kum ka kyrtong. Ka Sangma ka dei ruh ka MDC jong ka Garo Hills Autonomous District Council (GHADC).
Ha kawei ka liang, ka Congress bad BJP (ka seng ba ïatehlok bad ka NPP ha ka Sorkar MDA) kim pat pynbna ïa ki kyrtong jong ki.
Shuh shuh ka kyrteng jong u Jingjang M. Marak – uba ïajan bad u Saleng Sangma ka la mih shakhmat bad u lah ban long u kyrtong jong ka Congress, katba u MDC ka BJP ha GHADC, u Bernard N. Marak u la sdang ïa ka jingpynkhreh jong u ha Gambegre konstitwensi.
U Saleng u la mihkhmat ïa ka Gambegre konstitwensi naduh u snem 2013 wat la u la shah jied nyngkong eh kum u MLA ha u snem 2008 (na ka Congress) na ka Dalamgiri konstitwensi (hashuwa).
U la kynriah noh sha Gambegre konstitwensi ha u snem 2013 hadien ka jingpynbeit thymmai ïa ki konstitwensi hapoh ka Jylla bad hadien kane, u la shah jied lynter haduh ka ilekshon sha ka ïingdorbar thawaiñ ka Jylla ha u snem 2023 khlem shah rem.
