Washington, Risaw:
U President ka World Bank, u Ajay Banga, u la ai jingkheiñ antad ba ka jingjot bad jingjulor jong ka nongbah Gaza namar ka thma jong ka Israel ha kine ki shi snem lynter, ka la lut kumba $14 Billion haduh $20 Billion eiei bad ka long kaba eh ban pynbha bad ban pynbit- pynbiang ia ka nongbah Gaza ba kan lah ban long biang kumba ka ju long ha ki snem ba la leit.
Haba iakren bad ki nongthoh khubor ha nongbah Washington jong ka United States, u Banga u la ong ba ka thma jong ka Israel hapoh ka nongbah Gaza, ka la ktah jur ia ka ioh- ka kot bad ka jinglong- jingman hapoh ka nongbah Gaza baroh kawei bad ka long ruh kaba donkam ia kiwei pat ki ri ne ki tnat ka pyrthei ba kin nohsynñiang bad kin iarap ban kyntiew lem ia ka jinglong jingman hapoh Gaza ynda ka thma ka la kut.
Hynrei, kaba kham sngew duh nong, ka dei ka jingduh noh ia ki mynsiem briew ba lui-lui, kynthup naduh ki longkmie, ki khyllung- khynnah kiba long tang ki paidbah nongshong shnong jong ka nongbah Gaza bad ki bym shym la iadon bynta eiei bad ki lehnoh Hamas haba iadei bad ka jingleit hiar thma sha Israel. Hynrei, la ong ba ka Israel ka la shu leit thombor khlem sangeh ia man ki bynta jong ka nongbah Gaza, khlem pynsah shuh wat ia kito ki jaka ba shong bad bun da ki riew paidbah, kiba ki lehnoh Hamas ki shu don tang uwei – ar hynrei namar ba ka Israel ka la kwah ban pynlut noh phloiñ ia baroh ki dkhot jong ka kynhun lehnoh Hamas bad kumta ka la leit ban thombor naphang wat ha ki jaka ba shong ki riew paidbah ruh khlem jingsalia shuh.
