Khliehriat, Risaw 16
Ka Dkhiah West SC ka la long ka lahduh ha ka Third Division bad ka Musniang SC ha ka Second Division Football Tournament ba la pynïaid da ka East Jaiñtia Hills District Football Association (EJHDFA).
Kane ka la wan urlong hadien ba ki la ïoh jingjop ha ki jingïakhun final ha ka sngi Balang ha madan Artificial Turf Diengshynrum kaba ha Khliehriat.
Ha ka jingïakhun final jong ka Third Division, ka Dkhiah West SC ka la pynliem noh ïa ka Lumshnong YWSC da 1-0 kol. Kane ka nam jop ka la wan urlong lyngba ka shi kol ba la thep da u Nevermind Kya ha ka minit kaba 34.
Haba phai sha ka jingïakhun final jong ka Second Division, ka Musniang SC ka la lah ban pynliem noh ïa ka Sutnga Mission SSCC da 3-1 kol.
Ïa ki kol jong ka Musniang la thep ar kol da u Mardi Rymbai ha ka minit 23 & 69 bad kawei pat la pynbud da u Fourki Rymbai ha ka minit 74. Hynrei ka Sutnga Mission ka la pynphai kylla shi kol lyngba u Interest Pajuh ha ka minit kaba 32.
Ha kane ka sngi la sam ruh ïa ki khusnam shimet ha kaba ha ka Third Division ïa ka nam ‘Player of the Match’ la ïohpdiang da u Justin Niang na ka Lumshnong YWSC, katba ha ka Second Division la ïoh da u Mardi Rymbai na ka Musniang SC. Ïa ka nam ‘Player of the Tournament’ ha ka kyrdan Third Division la ïoh da u Coming Dkhar na ka Tuberkmai shnong, katba ha ka kyrdan Second Division la ïoh da u Heimonmi Dkhar na ka Musniang SC.
Ïa ka nam ‘Best Goalkeeper of the Tournament’ ha ka Third Division la ïoh da u Wadphang Phawa na ka Dkhiah West SC, katba ha ka kyrdan Second Division la ïohpdiang da u Commander Bareh na ka Lad Rymbai Dongwah SC. Ïa ka nam ‘Best Team’ ha ka Third Division la ïoh da ka Khliehriat East YWSC bad ka Musniang SC ha ka Second Division.
Ïa ka nam ‘Top scorer’ ha ka Third Division la ïoh da u Gradely Mylliem na ka Ratacherra CSC uba la thep 10 kol ha kane ka aïom, katba ha ka Second Division la ïoh da u Obadaïa Bareh, uba la thep 6 kol ha kane ka aïom ïalehkai.
Ïa ki khusnam sha kitei ki kynhun ba khur nam lahduh bad ba wan ba-ar la sam da u kongsan u Bah Rudion Roland Kyndait ha ka jingdonlang u Bah Daïapher Lamare, ki Waheh Shnong jong ki shnong bapher ka district, ki riew rangbah, ryngkat ki nongïalam bad dkhot ka EJHDFA.
