Shillong, Risaw 17
Hadien ka jingbym leh eiei ka tnat khlaw ban buh phalor noh ha ka khlaw ba don u lum jingtep ha Lawmali, u MLA ka VPP na North Shillong, u Bah Adelbert Nongrum hynne ka Sngi Palei u la leit ban ïakynduh ïa ka Deputy Commissioner ba kan buddien bad bthah ïa ka tnat khlaw ban buh ïa ka phalor bad u nongap ban plie ban khang ïa katei ka jaka namar ka la kylla long ka ktem jong ki kam sniew.
U Bah Adelbert u la ong ba ha ki hynriew hynñiew snem ki briew ki la rung mon da ki kali bad ki ar shaka ha katei ka khlaw ba don u lum jingtep ha ka por mynmiet, bad bynrap ba kane ka jingdonkam ka long ruh na ka bynta ban ïarap ïa ki samla kiba la shah teh shah khum ha ki jingsniew khamtam ha u drok.
Haba pynpaw ïa ka jingsngewkhia namar ka jingjyllei ki kam sniew ha katei ka jaka, u la ïathuh ba manla ka por u ju ïoh ïa ka jingujor jong ka jingdon ki briew kiba leh ïa ki kam sniew ha katei ka jaka.
“Ki la don ki jingjia ha kaba kawei ka longkmie ka la shah pajut ki sohshkor ha katei ka jaka, ïa kaba khlem don ba ujor, dang ha ka taïew ba la dep kawei ka khynnah ka la shah ksih ha katei ka jaka, hynrei donbok ba ka la laitnoh da ka jingwan ïaid ki kali,” la ïathuh u MLA.
Kane ka jingleit jong u MLA sha ka Deputy Commissioner ka long ban pynkynmaw halor ka rai jong ka jingïalang kaba khot da ka DC ïa ki Balang bad kumjuh ïa ki dorbar shnong ha ka 19 tarik Naitung 2023. “Ka rai ha katei ka jingïalang ka long ba la kyntu ïa ka DC ban ai jingthoh sha ka tnat khlaw ban buh ïa ka phalor bad uwei u nongap ha katei ka jaka, hynrei la shisnem khlem pat ïoh ïa kano kano ka jubab,” u la ong.
U Bah Adelbert Nongrum u la ïathuh ba halor kane ka jingbym ïoh jubab bad ka jingbteng ki jingsniew ha utei u lum jingtep, ha ka 3 tarik Jymmang 2024 u la lum noh ïa ka jingïalang bad 14 tylli ki Balang kiba pyndonkam ïa katei ka jaka ban tep briew. Ha katei ka jingïalang ki nongïalam Balang ki la ai jingmut ban buddien ïa ka rai jong ka jingïalang halor ka jingdonkam ban don da ka phalor bad u nongap ban lah ban plie ban khang ïa katei ka jaka da ka por.
