Shillong, Risaw 17
Ka jingkhaïi bad shalan tuh ïa ka shini ne kiwei kiwei ki mar sha Bangladesh ka bteng na kawei ka por sha kawei pat bad ka jingïoh kem bad kurup ruh ka long jan manla ka sngi.
Katkum ka khubor kaba la ïoh na ki pulit la ong ba ha ka 15 tarik mynta u bnai, ha ka por kumba 6.45 janmiet, ki shipai BSF ki la ïoh ban bat noh ïa uwei u khar Bangladesh ïa uba la tip kyrteng kum u Md. Hussain Ahmed (48 snem ka rta) na kawei ka jaka kaba hap hapoh ka BOP Lyngkhat, Pynursla ha East Khasi Hills.
La ong ba na une u khar Bangladesh, ki shipai BSF ki la ïoh ban kurup noh ïa ka shini haduh san byrni kaba shongdor haduh kumba T.10 hajar, ïa kaba la thmu ban shalan tuh sha Bangladesh lyngba ka khappud.
