Shillong Risaw 17
Ka Khun Hynñiewtrep National Awakening Movement (KHNAM) ka la dawa ba dei ban pynkhreh bha bin-pa-bin ha kaba ïadei bad ka mat ban pynkylla ïa ki kyndon hapoh ka Khyrnit Bahynriew lane 6th Schedule jong ka Riti Synshar bad dei ruh ban shim jingmut lang na ki babun balang halor kane ka mat.
Na ka liang u Working President ka KHNAM Central Executive Committee u Bah Thomas Passah u la ong ba ha kine ki sngi, la ïohi biang ïa ka jingïaid shakhmat ka jingïakren halor ka jingpynkylla ïa ka Sixth Schedule bad na ka liang ka seng, ka dawa ba Khasi Hills Autonomous District Council ka dei ban pynkhreh bin-pa-bin bad shim jingmut ruh na ki babun balang halor kane ka kam, khnang ban lait na ka jingmynsaw.
U la ong ba na ka liang ka seng, ka la dep ban ai jingmut halor kane ka bynta ha ki por kiba la leit, kiba kynthup ïa ka jingweng noh ïa ka Para 12 (a), ba ym dei ban don kino-kino ki kyndon ki ban aibor ïa ka Sorkar Jylla lane ka Sorkar Pdeng ban tuklar halor ki bor ka District Council.
U Bah Thomas u la ong ruh ba ka seng ka dawa ba ym dei ban pynkylla ïa ka kyrteng na ka Autonomous sha ka Territorial Council bad ruh ban khanglad ïa kiwei ki ‘unrepresented tribe’ ban long kum ki MDC ba shusieh. U la bynrap ba ka Council ka dei ruh ban buh shwa ha ki rynsan paidbah ïa kita ki jingtyrwa kiba dei ban pynkylla ïa ka Sixth Schedule ha shwa ban phah sha ka Sorkar Pdeng khnang ban lait na ki kynrum-kynram hadien habud. Kumta u la ong ba kum ka seng, ka sheptieng ïoh ba ka Sorkar Pdeng kan pynkylla ïa ka Sixth Schedule da ka jingthmu barieh ban ïoh ban tih ïa u mar poh khyndew “Uranium”.
Une u nongïalam ka KHNAM u la ong ruh ba ka seng ka khmih lynti ruh ba ka Council kan khot ïa ka jingïalang jong baroh ki seng saiñ pyrthei lane all political party meeting, ha shwa ban shim ïa ki rai bakhatduh.Kwah ka KHNAM ban pynkhreh bin-pa-bin bad shim jingmut na ki babun balang halor ka Khyrnit 6th
