Tura, Risaw 17
Sa tang katto katne taïew ban leit sha ka ilekshon MLA shiteng samoi ha Gambegre, ka All India Trinamool Congress (AITC) ka la thoh sha u Returning Officer (RO) halor ka jingkynnoh ba ka la don ka jingpynkheiñ ïa ki kyndon jong ka Model Code of Conduct (MCC) da ka National People’s Party (NPP).
Ha ka jingujor kaba la mudui hynnin ka sngi, da u district coordinator ka West Garo Hills, u SN Sangma, ka TMC ka la pynpaw bad kynnoh ba ki nongtrei ka NPP ki la sam ïa ki CGI sheet (ki tin tap tnum) ha kylleng ki bynta jong ka konstitwensi ha ka jingpyrshang ban pynbiej ïa ki nongthep vote.
“Kane ka jingpyndonkam bakla ïa ki bor Sorkar kam dei tang ka jingbym don akor hynrei ka lam ruh sha ka jingbamsap. Wat hadien jong ka jingpynbna ïa ka tarik ilekshon bad ka jingtreikam jong ka MCC, ka NPP ka la bteng ïa kine ki kam,” ong ka jingujor ha kaba la bynrap ruh ba ka jingsam ïa ki tin CGI ka la long ha ka shnong Aminda Simsang ha ka 16 tarik mynta u bnai.
Shuh shuh, ka TMC ka la kynnoh ruh ba bun bah ki tin CGI la dep ban buh lypa da ka NPP ha ki polling station bapher bapher na ka bynta ban sam sha ki nongthep vote, kaba ki la bynrap ruh ba ka dang ïaid khlem sangeh.
Ka TMC ka la pan jingïarap ne ka jingtuklar na ka liang jong u RO ban pynsangeh noh mardor ïa kine ki kam jong ka NPP.
Ka jingthep vote ha ka ilekshon shiteng samoi ha Gambegre Konstitwensi kan long ha ka 13 tarik Naiwieng bad ka jingdonkam ban pynlong ïa kane ka ilekshon shiteng samoi ka la long hadien ka jingiehnoh kam jong u Saleng Sangma, uba la jop ïa ka ilekshon MP na ka Tura Parliamentary Seat.
Kumba ka paw haduh mynta, ka jingïakhun ka lah ban long hapdeng ki saw ngut ki kyrtong, ka NPP ka la sei da ka kurim jong u Myntri Rangbah ka Mehtab Chandee Sangma ka ban ïakhun pyrshah ïa ka Sadhiarani Sangma ka kyrtong jong ka TMC bad kurim jong u Myntri barim ka Jylla, u Jingjang M Marak u kyrtong jong ka Congress bad ka BJP kaba la pynpaw ka jingthrang ban ïakhun ha kane ka ilekshon, hynrei haduh mynta kam pat pynbna ïa la u kyrtong.
