Shillong, Risaw:
U nongïalam ka National People’s Party (NPP) uba dei ruh u Myntri ha ka Sorkar MDA, u Rakkam A Sangma u la ong ba ka jingkynnoh jong u MDC ka BJP na Tura, u Bernard Marak halor ka jingai jingïarap sha ki lanot shlei um ha Garo Hills ka dei kaba la shu kren khyllung khynnah bad kaba ïalam bakla.
Ka jingïarap sha ki lanot ba shah ktah na ka jingshlei um bad ka jingtwa khyndew ha Rilum Garo ka la kylla politik, hadien ba u MDC ka BJP na Tura, u la kynnoh ba ka jingïarap la ai tang sha kito kiba la kohnguh ban pynïasoh sha ka NPP.
U MLA ka Rongara Siju u la ong, “Ym dei ban leh politik haba don kum kito ki jingjia bad bynrap shuh shuh ba ki jingïarap ba la ai sha ki lanot ki long khlem da kheiñ seng, bad bynrap ba u Bernard u dei ban pyrkhat kum u parabriew shabar na ka seng ba u don.”
“Ha kum kane ka por ka jingïarap ka dei da ka jingsngew parabriew, ym dei ban pynïakhleh ïa ka jingïarap jong Sorkar bad ka NPP namar ki dei la ka jong”, la ong u MLA, ha kaba u la ïathuh ba ka NPP ka la ai ki jingïarap da ki tiar ki tar bad ki marbam, bad wat ka Congress ka la ai ïa ki jingïarap, bad ong shuh shuh ba ka BJP ruh ka la dei ban leh kumjuh.
U Rakkam u la ong ba da kaba ai jingïarap ïa ki lanot, kam mut ba ki dei ban kyrshan ïa ka seng. “Ym dei ban ïaleh politik ïa kum kine ki kam, namar ka long ka bym lah ban pdiang”, la ong u Rakkam.
