Shillong, Risaw 17
U Myntri ba khmih ïa ka tnat Social Welfare ka Jylla, u Bah Paul Lyngdoh ha ka Sngi Palei u la pyntip ba ka jingïakhih bad jingïakynad kaba dang bteng haduh mynta ha Manipur, ka la pynkynriah noh ïa ka kam khaïi drok sha Meghalaya, kaba la wanrah ïa ka jingeh kaba khraw.
“Ngi la khih ban pynduhjait ïa ka jingma jong u drok. Kaba sngewsih ka long, namar ka jaka kaba donkam bha, kaba jan bha bad ka Golden Triangle, bad ka jingshisha ba ka jingkulmar ha Manipur ka la pynlong ïa ka jingkynriah ïa ka khaïi na katei ka jaka sha Meghalaya, kata ka dei ka jingeh kaba khraw,” ong u Bah Paul.
U la pyntip, “Ngan sa leit sha nongbah Delhi ban batai bniah bad ban pynthikna ba ki nongïalam ha ka Sorkar India kin ïoh ka jingtip kaba bniah shaphang ka jingma bad ka jingheh jong ka jingkhaïi drok kaba jia ha ka jylla”.
Haba kylli la ka DGP bad ki bor jong ka aiñ ki la don lypa ha ka jingpynkhreh, u Bah Paul u la ong, “Hooid, ki tip halor kane, bad dei na kata ka daw ba mynta la pynkhlaiñ ïa ka kynhun Anti Narcotics Task Force (ANTF). Ha ka Dream Mission jong ka Sorkar, mynta ngin sa don ïa ki IPS ophisar kiba la shongthait, kum ki Mission Director. Kumta ngi la trei shibun ki kam bad shim ruh bun ki lad ki lynti ban pynthikna ba ngin lah ban pynduna shwa bad nangta ban pynduh jait ïa kane ka jingeh”.
Shuh shuh u Myntri u la ong, “Bun kiei kiei kiba la leh ïa kaba ym lah ban ïohi tang da ki khmat jong phi, hynrei bun ki paralok ki don ha ka jingpynkhreh ban thaw ïa ka Village Defence Party (VDP)”.
Haba pyntip ba ki don tang 11 tylli ki VDP kiba la thaw katkum ka aiñ, u Bah Paul u la ong ba bunsien ki jaka kiba hap hapoh ki ‘high risk zone’ kim don ïa kine ki VDP. Haba kim don ïa ki, ym don ka jingkyrshan jong ka aiñ, bad ha kiba bun ki khep ki kut noh ha ka jinglynga namar ki hap ban ïai leit mih hakhmat ka ïingbishar, kumta kine baroh kin sa duna tad ynda la don ïa ka VDP, namar ka dei ka aiñ kaba la kyrshan da ka aiñ bad kaba treikam ryngkat bad ka tnat pulit.
