Moscow, Risaw:
Katkum ki khubor, la ong ba uwei u nongpeit ia ka ‘Zoo’ ha kawei na ki jaka ri mrad ba heh tam hapoh ka dew bah Europe, u la shah ktha im ha ki sing kiba don ha katei ka jaka ri mrad hadien ba u la kum klet ban khang ia ka jingkhang jong katei ka jaka.
Kane ka la jia hapoh ka Taigan Safari Park ha ka thaiñ ba Crimea Peninsula kaba iasoh bad ka Russia bad kaba long ruh kawei na ki bynta kaba don bun tam ki sing ha Europe.
Kumta na ka liang ka tnat ba dei khmih jong ka Russia ka la phah ban wad bniah halor katei ka jingshah pyniap jong utei u nongpeit ia katei ka jaka ri mrad ha kitei ki mrad kiba don ha katei ka jaka.
Utei u nongpeit u dei ba la trei kumba 17 snem ha katei ka jaka ri mrad. Kane ka la jia katba u dang leit ban pynkhuid ia ka jaka shong jong 3 tylli ki sing khlem da kynmaw pat ban khang ia ka jingkhang napoh jong katei ka ruh ba set ia kitei ki sing. Namar kata, dei kane ka daw kaba la pynioh lad ia kitei ki sing ba kin leit rung shapoh jong katei ka jaka kaba u rung ban pynkhuid bad ki la patar ia ka met jong u haduh ba un da iap noh syndon hajuh.
