Jowai, Risaw 17
Ka Jalapang ka la jam sha ka quarter final ha ka lympung ïalehkai 8th Invitation Knockout Football Tournament ba la pynïaid da ka Wahïajer Sports Club hadien ba ka la lah ban pynliem noh ïa ka Evergreen SC da 3-0 kol ha ka Sngi Palei ha madan Wahïajer Sports Complex.
Ha kane ka jingïakhun pre-quarter ka Jalapang ka la ïoh ban pynkhih jar nyngkong eh ha ka minit kaba 4 lyngba u Pynkhreh Talang. Kane ka kynhun ka la thep biang sa ar kol ha ka kylla miet lyngba u Gideon Mukhim ha ka minit kaba 68 bad Marlangki Suting ha ka minit kaba 78 na ka bynta ban jop syndon.
U Sanjini Gokhar uba ong u rangïalehkai ka Jalapang, u la ïoh-pdiang ïa ka nam ‘Man of the Match’.
Kawei pat ka jingïakhun pre-quarter final kan long ha ka Sngi Saitjain ha kaba ka Nangbah Mulang kan ïakhun pyrshah ïa ka Mawryngkneng Mission SC ha ka por 2 baje janmiet.
