Guwahati, Risaw:
Ki nongmihkhmat jong ka Sorkar Nagaland shen kin sa ïakynduh ïa u Myntri Rangbahduh u Narendra Modi, u Amit Shah uba long u Myntri ka sorkar kmie uba dei khmih ïa ka tnat ki kam pohïing bad u Myntri Rangbah jong ka Assam u Himanta Biswa Sarma ban ïakren bad ïamir jingmut ha kaba ïadei bad ki jingïakajia pud kaba dang ïaid shakhmat bad kane ka jylla ba marjan, la ong u Myntri Rangbah ka Jylla u Y Patton.
U Patton u la ïathuh ïa kane sha ki nongshong shnong ha ka sngi Ba-ar ha ka por ba u la leit ban jngoh ïa ka Tuli kaba don ha ka Mokokchung distrik ha khappud bad ka Assam ban khmih bniah halor ki jinglong jingman ha kaba ïadei bad kane ka bynta. Ïa u Patton, uba bat ruh ïa ka tnat ki kam pohïing bad ki kam ba ïadei bad ki bynta khappud, la synran lang da u MLA ka thaiñ, u A Pangjung Jamir, u DGP u Rupin Sharma bad ki ophisar jong ki bor pynïaid distrik, la ïathuh ka jingthoh ba la phah da ki heh ba dei khmih.
Kane ka kynhun ka la leit ban jurip ïa ki jaka ba la dei ban shim khia ban hap leh ei ei, kynthup ïa ka ktem jong ki pulit Assam Commando Battalion ha Septsuyong Lu ha ka shnong Kangtsung bad ka shnong Wameken Yimsen, la ong ka jingthoh.
Kane ka jingleit jngoh ka long halor ka jingthmu ban khmih bniah halor ki jinglong jingman bad ban ïamir jingmut bad ki riewpawkhmat bad ki bor ba dei khmih ha kum kane ka por ba bun ki kynrum kynram kiba ha ka thaiñ khappud, la ong shuh shuh ka jingthoh.
U la pyntip sha ki nongshong shnong ba la dep ban phah shithi sha u Myntri Rangbahduh, sha u Myntri ka tnat ki kam pohïing bad sha u Myntri Rangbah jong ka Assam ban pynbeit bad ïasngewthuh jingmut halor kine ki jingeh. Ka Nagaland ka don 512.1 km u pud u sam hapdeng ki jylla bad ka Assam. Katba baroh arliang mamla ki kynnoh kawei ïa kawei pat ba ki shim jaka ha ka Disputed Area Belt, ka mukotduma halor kane ka jingïakajia pud ka la ïaid shakhmat ha Supreme Court la kumba katto katne snem mynta.
