Shillong, Risaw 17
Ka Ryntih FC bad ka Shillong Lajong FC ki la sdang da ka jop ha ka lympung ïalehkai OC Blue Shillong Premier League 2024 ha ka Sngi Palei ha SSA Stadium kaba ha First Ground, Polo.
Ha ka jingïakhun kaba nyng-kong, ka Ryntih ka la pynliem noh ïa ka Nongthymmai SC da 3-0 kol. Kane ka nam jop ka la wan urlong lyngba ki kol u Yami Longvah, Damiki Khongstia bad u Wanshanlang Dkhar na ka bynta ban ïoh ïa ki lai point.
Kumba paw ha kane ka jingïakhun baroh ar kynhun ki la pyrshang ban ïakhun tyngeh naduh kaba sdang ha kaba kim shym la lah ban thep kol haduh kaba kut jong ka kylla step. Hynrei ka Ryntih ka la lah ban pynurlong ha ka kylla miet lyngba u Wanshanlang ha ka minit kaba 49.
Kane ka kynhun ka la thep biang sa ar kol lyngba u Yami ha ka minit kaba 71 bad Damiki (76) na ka bynta ban ïoh jingjop syndon.
Haba phai sha kawei pat ka jingïakhun, ka Lajong ka la pynliem noh ïa ka Langsning FC da 4-0 kol bad u Deibormame Tongper u la ïoh ïa ka hat-trick kaba nyngkong eh ha kane ka aïom.
Wat la dangshen ka Langsning ka la rai ban weng noh ka jingshim bynta ha kane ka lympung, hynrei ha ka kyllipmat kaba khatduh ka la rai ban bteng biang mynta ka aïom. Kumba kane ka klob kam shym la soi ïa ki rangïalehkai kiba thymmai bad ka la pynïalehkai beit da ki barim.
Ka jingtlot jong kane ka kynhun ka la pynlong ïa ka Lajong ban ïoh ïa ka kabu kaba biang eh ha kaba ka la ïoh ban pynkhih jar nyngkong eh lyngba u Kynsaibor Lhuid ha ka minit kaba 21. Hadien shi kynta kane ka kynhun ka la thep biang ïa ka kol ba ar lyngba u Deibormame ha ka minit kaba 34.
Tang hadien san minit u Deibormame u la thep biang ïa ka kol ba ar na ka bynta ban pynlong ïa ka Lajong. Haduh kaba kut jong ka kylla step ka Langsning kam shym la lah ban pynphai bad ka Lajong ka dang tam da 3-0 kol.
Hadien katto-katne por ba la bteng biang ïa ka jingïakhun jong ka kylla miet, u Deibormame u la thep biang sa shi kol na ka bynta ban ïoh syndon ïa ka hat-trick hadien ba u la thep ha ka minit kaba 72. Haduh kaba kut ka liang pyrshah kam shym la lah ban thep kol bad ka la mad ïa ka jingshah rem.
Ha ka Sngi Thohdieng kan don tang kawei ka jingïalehkai hapdeng ka Rangdajied United FC (kaba la wan ba-ar ha ka aïom ba la dep) pyrshah ïa ka lahduh ka Mawlai SC. ïa kane ka jingïalehkai yn pynïalehkai ha ka por 5:30 janmiet lyngba ki jingshai na ki floodlight.
