Nongstoiñ, Risaw:
U Babu G Ningstar Marthong uba la dep shim ïa ka Voluntary Retirement Service (VRS) na ka kam hikai bad uba don bynta ruh mynta bad ka Congress hapoh ka Nongstoiñ Konstitwensi, u la kut jingmut bad shim ïa ka rai ban mih shakhmat ban ïakhun ha ka ilekshon MDC ka ban wan, lada ki nongïalam ka seng ki ibit ïa u ban ai ïa ka tiket.
Haba ïakren bad u nongthoh khubor, u Babu Marthong u la ong ba ha ka jingshisha, kumba la pynpaw la bun tylli ki snem ba ki paidbah ki kwah ba un ïakhun ilekshon hynrei na ka liang jong u, um shym la pdiang. Pynban mynta ka kynti, namar ka jingïai kyntu jong u paidbah, u la shim ïa ka rai ba lada ka Congress ka ibit ban ai ïa ka tiket, un mih shakhmat ban ïakhun ha ka ilekshon MDC.
Haba kren halor ka jinglong-jingman jong ka saiñ hima-sima hapoh ka Nongstoiñ Konstitwensi bad Jylla hi baroh kawei, u Babu Marthong u la ong, “Ka jinglong-jingman jong ka saiñ hima-sima haba peit mynta kam long eh tang ka Nongstoiñ hynrei haba pyrshang ban twad kylleng khamtam ha kane ka Rilum Khasi bad Jaiñtia, ka lyer lane ka sur jong ki paidbah kiba bun ka long ba mynta ngin jied tang ïa ki ar tylli ki seng kata ka Congress bad ka VPP, hynrei napdeng kine ar tylli, ka sur u paidbah ka long ba kim dei ba ki bynshet ïa kano-kano ka seng hynrei kin jied pat ïa u kyrtong u ban ïaleh sa na kata ka seng.”
Halor ka jingmih jong u Bah Gabriel Wahlang, MLA ka Nongstoiñ na ka Congress, u Babu Marthong u la ong, ha ka saiñ hima-sima ki don la ka jong ka jong ka jingthmu, ki don la ka jong ka jingïohi, ha kaba ka jingïohi ka jong u MLA ka Nongstoiñ lehse u don la ka jong ka jingthmu ban leh khambha ïa ki paidbah da kaba u mih noh na ka seng. Ïa kane ym lah ban ong kumno-kumno, hynrei ha ka jingïadei bad u paidbah patde haba u la mih noh, ban ong ba kan ktah ïa ka Congress, kam don namar ki paidbah ki pynjop tang ïa u briew, bad kumba ïohi mynta ki don katto-katne ki ïabud ïa u, artad ba ka dang dei ka por ba ki khmih lynti ïa u MLA ba ki la pynjop hynrei ym tip la ïa ka vote kin vote ne em, hynrei haba peit patde ki nongtrei ka Congress ki dang don ha kylleng ki jaka.
Haba ïadei bad ka ilekshon MDC bad la u don ka jingsngew skhem khamtam ka jingkiew bad sawa ka sur ka VPP, u Babu Marthong u la ong, ka jingïakhun hi ka long thik kum ka jingïalehkai phutbol hynrei dei ban long pat kiba la pynkhreh.
“Ka jingjop bad ka jingrem ka don la ka bynta nalor ka jingtrei shitom bad ka bynta u nongthaw ruh ka don, bad ka jingkhih phaloh jong kine kiwei ki seng ruh ka don. Nga sngewskhem ba ngi don ka thong ban jop namar ki paidbah hi kim pat kyntait ïa ka Congress,” u la ong.
U la ong ruh ba ka jingkhih phaloh jong ka VPP lada kheiñ ha ka ilekshon MP ka la long shaba palat. Hynrei mynta haba twad jingmut na ki paidbah, ki ong ba ha ka ilekshon MP ki briew ki la jied ïa u Bah Vincent H Pala ha kine ki snem bad ki la ïohi ïa ka jingtreikam ka jong u kumto te ki kwah ïa ka jingpynthymmai. Pynban ha kaba ïadei bad ka ilekshon MDC bad MLA ym ïohi ba kan long kumta namar ïatyngkhuh para met, bad lah ban ong ba ïakynduh markhmat bad ki paidbah bad kata ka jingïadei jong ki nongmihkhmat bad ki paidbah ka don da kawei pat ka rukom.
