Nongpoh, Risaw 18
U Ankit Mishra, Deputy Secretary ka Sorkar Pdeng ba dei khmih ïa ka North East Special Infrastructure Development Scheme (NESIDS) mynta u la wan ïuh kjat ha Ri-Bhoi District ban lum jingtip bad pynlong ïa ka jingjurip ba ar sngi lynter ïa ki skhim bapher-bapher kiba la pyntreikam lyngba ka ‘Aspirational District’ bad ‘Aspirational Block’.
Ka jingthmu ba kongsan jong kane ka jingwan ïuh kjat utei u Deputy Secretary ka Sorkar Pdeng ka dei ban khmih bniah halor ki jingkdew jong ka jingpyndep ïa ki jingtreikam (performance indicator) halor ki skhim ki bapher-bapher kum ha ka koit ka khiah, ka pule puthi, ka rep ka riang bad kiwei-kiwei nalor ka jingleit jurip markhmat dalade ïa ki shnong kiba la pyntrei ïa kitei ki skhim hapoh ka distrik.
Ha kane ka sngi sdang jong ka jingwan ïuhkjat, u Ankit Mishra u la sdang shuwa da ka jingïalang ha ka Conference Hall jong ka ophis u Deputy Commissioner ka Ri-Bhoi ban khmih bniah ïa ka jingpyntreikam ïa ki skhim ‘Aspirational District Programme’ ha kaba la wan ban ïadon ryngkat naduh u Raja Brahmah, Additional Deputy Commissioner bad uba dei ruh u Project Director ka District Rural Development Agency (DRDA), ka Kong B.L. Pakyntein, Additional Deputy Commissioner, u Bah Eric C. Dkhar, Block Development Officer jong ka Umling C&RD Block nalor kiwei-kiwei. Ha kane ka jingïalang, na ka liang u BDO ka Umling C & RD Block, u Bah Eric C. Dkhar u la pyni da ki dur ki dar halor ka jingïaid shaphrang jong ki skhim bapher-bapher kiba la pyntreikam hapoh ka distrik katkum katei ka ‘Aspirational District Programme’. Na ka liang u Ankit Mishra, u la ai ka jingïaroh ïa ki bor distrik halor ka jingïaid shaphrang jong ki kam kiba la pyntrei bad pynshlur ruh ïa ki ba kin nang trei shitom shuh-shuh ban kyntiew shaphrang ïa ka distrik khamtam ban ïoh ha ka kyrdan kaba shakhmat katkum ka ‘Delta Ranking System’.
Hadien jong kane ka jingïalang, u Ankit Mishra u la leit ruh ban jurip dalade ïa shibun ki jaka ba kynthup ïa ka Ri-Bhoi Presbyterian Higher Secondary School ha Pahamlapong, ka Umsning CHC, ka Tea Boutique & Eco-Tourist Lodges kaba don ha Tea Development Centre (TDC), Umsning, ka Umroi CSC bad ka Auxilium Skills Training Centre ha Khapmara.
Lashai ka sngi pat, ka 19 tarik u bnai Risaw 2024, na ka liang u Ankit Mishra un sa leit ban jurip sa ïa ka Umsawnongkharai Sub-Centre, ka Umdihar Anganwadi Centre (AWC), ka shnong Dulongnar bad kiwei-kiwei de ki shnong kiba la tip kum kita ki ‘Model Village’.
